काठमाडौं । नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले विश्व वातावरण दिवस २०८२ को अवसरमा एक शुभकामना सन्देश जारी गर्दै वातावरण संरक्षण, जलवायु न्याय र दिगो भविष्यको पक्षमा लागिपर्न सबैलाई आह्वान गर्नु भएकोछ ।
“प्लास्टिक प्रदूषण अन्त्य गरौँ” भन्ने नारासहित मनाइँदै गरेको यस वर्षको वातावरण दिवसले मानव समाजले सामना गरिरहेकै एक प्रमुख चुनौतीतर्फ विश्व समुदायको ध्यान केन्द्रित गराएको अध्यक्ष प्रचण्डले उल्लेख गर्नुभएको छ । उहाँले वातावरणीय न्यायप्रति सबैले व्यवहारिक प्रतिबद्धता जनाउनुपर्ने आवश्यकता औंल्याउँदै प्लास्टिकजन्य प्रदूषण नेपालजस्तो जैविक विविधतायुक्त र भौगोलिक रूपमा संवेदनशील मुलुकका लागि गम्भीर खतरा बन्दै गएको चेतावनी दिनुभएको छ ।
उहाँले सहरी क्षेत्रदेखि ग्रामीण बस्तीहरूमा प्लास्टिक फोहोर व्यवस्थापन एक जटिल चुनौतीका रूपमा देखिएको भन्दै प्लास्टिक प्रदूषणलाई आजको प्रतिस्पर्धी पूँजीवादी प्रवृत्तिको परिणामको रूपमा चित्रित गर्नुभएको छ । यसले जनस्वास्थ्य, खाद्य सुरक्षा, जलस्रोत र जैविक प्रणालीहरूमा दीर्घकालीन असर पारिरहेको उल्लेख गर्दै उहाँले सबै क्षेत्रका सरोकारवालालाई गम्भीर बन्न आग्रह गर्नुभएको छ ।
शुभकामना सन्देशमा प्रचण्डले प्रधानमन्त्रीको रूपमा कार्यरत रहँदा वातावरणीय विषयलाई नीति निर्माणको मूल एजेन्डा बनाउँदै राष्ट्रिय तथा अन्तर्राष्ट्रिय मञ्चहरूमा नेपालका पर्यावरणीय चासोलाई प्रभावकारी रूपमा प्रस्तुत गरेको स्मरण गराउनु भएको छ । उहाँले जलवायु परिवर्तनका कारण नेपालले भोग्नुपरेका असरको क्षतिपूर्तिको माग, पर्वतीय मुलुकहरूको समस्या, हरित ऊर्जा, अनुकूलन रणनीति र वातावरणमैत्री नीति निर्माणमा केन्द्रित प्रयासहरू उल्लेख गर्नु भएको छ ।
संयुक्त राष्ट्रसंघका महासचिव एन्टोनियो गुटेरसको ऐतिहासिक नेपाल भ्रमण र त्यसभन्दा अघि तथा पछि वातावरणसम्बन्धी मुद्दाहरूमा भएका छलफलहरूलाई पनि प्रचण्डले विशेष महत्वका रूपमा स्मरण गर्नुभएको छ ।
अन्त्यमा, अध्यक्ष प्रचण्डले सबै नागरिक, विज्ञ, युवा, महिला र सरोकारवालाहरूसँग प्लास्टिकको प्रयोग न्यून गर्न, पुनःप्रयोग र पुनःचक्रणलाई प्राथमिकता दिन, वातावरणमैत्री जीवनशैली अपनाउन र वातावरणीय न्यायका पक्षमा आवाज उठाउन अपिल गर्नुभएको छ । 
