संवाददाता, नेपालगंज ।
कृषि ज्ञान केन्द्र बाँके (नेपालगंज) मा आज बिहानै देखी धान विक्रीका लागी सिफारिस लिने कृषकहरुको भीड लागेको छ ।
नेपाल सरकारको स्वामित्वमा भएको खाद्य संस्थानले कृषिको सिफारिस (कुपन) का आधारमा धान खरिद गर्ने भएपछि सिफारिस लिन कृषकहरु बिहानै पुगेका हुन ।
कृषकहरुको भीड बढेपछि कुपन वितरण गर्न नै समस्या देखिएको छ ।
कृषि ज्ञान केन्द्रका कृषि अर्थ बिज्ञ जीवन कुमार केसीले सुरक्षा निकायको सहयोगमा लाइन ब्यवस्थित गरी जग्गाको लालपुर्जा (जग्गा धनी प्रमाण पत्र), नागरिकता लगायतका कागज पत्रको आधारमा एक जना कृषकलाई ३० क्विनटल सम्म धान बिक्री गर्नका लागी सिफारिस (कुपन) दिने कार्यालयको योजना रहेको जानकारी दिनुभयो ।
खाद्य संस्थानले यसपालिका कृषकबाट मोटा धान २ हजार ७ सय ५२ रुपैंया र मध्यम धान २ हजार ९ सय २ रुपैंयाका दरले खरिद गर्ने भनी मूल्य निर्धारण भएको उल्लेख गरेको छ ।
यही मंसिर २६ गतेबाट खाद्य संस्थानले धान खरिद गर्ने योजना बनाएको छ ।
