संवाददाता, नेपालगंज ।
निर्मला कुर्मी र नन्कुन्नी धोबी हत्या घटनाका दोषिलाई कारबाहीको माग राखी मृतकका आफन्तले जिल्ला प्रशासन कार्यालय बाँकेमा लगातार धर्ना दिईरहेका छन ।
बाँकेको नेपालगंज १७, परसपुरकी निर्मला कुर्मीको अपहरण पछि हत्या गरिएको र जानकी २ नेवाजी गाउँकी नन्कुन्नी धोबीको परिवार भित्रैबाट दिईएको यातनाका कारण ज्यान गएको पीडितका आफन्तले बताएका छन ।
महिला अधिकार मंच नेपालगंजको अगुवाईमा मृतकका आफन्त न्याय माग्दै लगातार ६ दिन यतादेखी अनिश्चितकालिन धर्नामा बसे पनि न्यायिक निकायले भने कुनै चासो नदिएको पीडित पक्षको गुनासो छ ।
पीडितलाई न्याय दिनुको सट्टो उल्टो धम्काउने, मुद्दा दर्ता नगर्ने, झूठा किर्ते कागज तयार पार्ने काम गरेको भन्दै बाँकेका प्रमुख प्रहरी उपरिक्षक (एसपी) श्याम कृष्ण अधिकारी र प्रहरी नायव उपरिक्षक (डिएसपी) मधुसुदन न्यौपान्नेलाई पनि कारबाही गरियोस भन्ने माग राखेका छन ।
प्राप्त केही विवरण अनुसार, नेपालगंज १७, परसपुरकी निर्मला कुर्मी अपहरण पछि हत्या घटनामा राजनितिक कनेक्सन पनि जोडिन्छ ।
त्यसैको प्रभाव र दवावले गर्दा पहुँच बिहीन पीडितले हत्या भएको लामो समयसम्म पनि न्याय पाउन नसकेको उल्लेख छ ।
