कञ्चनपुर । कोरोना संक्रमणको जोखिम कम गर्न कञ्चनपुरको गड्डाचौकी नाकामा खोप अभियान संचालन गरिएको छ । भारतबाट आएका व्यक्तिहरुबाट कोरोना संक्रमण नभित्रियोस भनेर गड्डाचौकी नाकामा खोप अभियान संचालन गरिएको हो ।
नेपालमा कोरोनाको संक्रमण नाकाबाटै फैलिने भएकाले स्वदेश भित्रिने नेपालीहरुलाई कोरानाको खोप दिन थालिएको जिल्ला स्वास्थ्य कार्यालय कञ्चनपुरले जनाएको छ ।
भारतमा कोरोनाको सबैभन्दा जोखिमयुक्त ठाउँ भएकाले त्यहाँबाट आउने व्यक्तिहरुलाई खोप दिँदा त्यसले संक्रमणबाट सुरक्षित बनाउने जिल्ला स्वास्थ्य कार्यालय कञ्चनपुरका प्रमुख शिवराज सुनारले बताउनुभयो ।
भदौ १० गतेबाट सुरु गरिएको खोप अभियानमा गड्डाचौकी नाकामा मात्रै झण्डै दुई सय जनालाई कोरोना विरुद्धको खोप लगाइएको छ । स्वास्थ्य कार्यालयले भारतबाट आउने नेपालीहरुमध्ये झण्डै ८० प्रतिशतले खोप लगाएको जनाएको छ । ईमेजखबर
