काठमाण्डौ । आयात बढेसँगै सरकारले १८ वर्ष माथिका सबैलाई खोप दिने लक्ष्यअनुसार खोप केन्द्र बढाउँदै लैजाने भएको छ । यसले खोप केन्द्रमा देखिएको भीड व्यवस्थित गर्न सहयोग पुग्ने छ । खोप अभियानलाई व्यवस्थित गर्नकै लागि मन्त्रालयले अनलाइनमार्फत नाम दर्ता गर्न पनि थालेको छ ।
यस्तै, खोपलाई कार्यक्रमलाई प्रभावकारी ढङ्गले चलाउन केन्द्रसँगै स्वास्थ्यकर्मीको परिचालन पनि बढाउने तयारी भइरहेको स्वास्थ मन्त्रालयका सहप्रवक्ता डाक्टर समिर अधिकारीले बताउनुभयो । खोपको आयातलाई हेरे केन्द्र थप्दै जाने उहाँको भनाइ छ । तर, खोप केन्द्र र स्वास्थ्यकर्मी थपेर मात्रै समस्या समाधान नहुने भन्दै उहाँले आफ्नो पालोमा मात्रै खोप लगाउन आग्रह गर्नु भएको छ ।
स्वास्थ्य मन्त्रालयले भोलिदेखि कोभिसिल्डको दोस्रो मात्रा वितरण गर्ने जनाइसकेको छ । कोभिशिल्डको दोस्रो मात्राको पर्खाइमा रहेका ज्येष्ठ नागरिकलाई यो खोप दिइनेछ । हिजो जापानले उपलब्ध गराउने भनेको १६ लाखमध्ये ४ लाख डोज खोप काठमाण्डौ आइपुगेको छ । आज थप ४ लाख खोप आउने छ ।
अस्ति भुटानबाट तीन लाख खोप आएको थियो । प्राप्त यी खोप अहिले दिइरहेका केन्द्रबाट ज्येष्ठ नागरिकलाई दिइने मन्त्रालयले जनाएको छ । सरकारले गएको वर्ष फागुन २३ देखि चैत ३ गतेसम्म ६५ वर्षमाथिका ज्येष्ठ नागरिकलाई कोभिशिल्ड खोप लगाएको थियो । झण्डै १४ लाख ज्येष्ठ नागरिक अहिले कोभिसिल्डको दोस्रो मात्राको पर्खाइमा छन्।
