काठमाडौं । ३२ औं गृष्मकालीन ओलम्पिक खेलकुद टोकियो ओलम्पिकमा ९५ स्वर्ण पदकको छिनोफानो भएको छ ।
रसियन ओलम्पिक टिमसहित ३५ राष्ट्रले स्वर्ण पदक जितेका छन् । ओलम्पिकको छैटौँ दिन सकिँदा पदक तालिकामा आयोजक जापानले अग्रता कायमै राखेको छ । जापानले अहिलेसम्म १३ स्वर्ण र चार रजतसहित २२ पदक जितेको छ । यस्तै जापानलाई पछ्याइरहेको चीनले १२ स्वर्णसहित २७ पदक जितेको छ भने तेस्रो स्थानमा रहेको अमेरिकाले ११ स्वर्णसहित ३१ पदक जितेको छ । रसियन ओलम्पिक कमिटीले सात स्वर्ण जित्दा, अस्ट्रेलियाले ६ स्वर्ण जितेको छ ।
त्यसैगरी बेलायतले ५, दक्षिण कोरियाले ४, जर्मनी र फ्रान्सले तीन÷ तीन स्वर्ण जितेका छन् । २ स्वर्ण जित्नेमा नेदरल्यान्ड्स, क्यानडा, हङ्गेरी, स्लोभानिया र कोसोभो रहेका छन् । त्यस्तै १ स्वर्ण जित्ने राष्ट्रको सङ्ख्या २१ रहेको छ ।
टोकियो ओलम्पिकमा नेपालकी पौडी खेलाडी गौरिका सिंहले राष्ट्रिय कीर्तिमान बनाउनु भएको छ । एक सय मिटर फ्रि–स्टाइलमा गौरिकाले एक मिनेट दशमलव ११ सेकेन्डको कीर्तिमान बनाउनु भएको हो । ओलम्पिकमा राष्ट्रिय कीर्तिमान कायम गरे पनि गौरिका अघिल्लो चरणमा पुग्न भने असफल हुनुभयो ।
पौडीमा नेपालका एलेक्स साह पनि हिट चरणभन्दा माथि पुग्न सक्नु भएन । यसअघि नै जुडो र सुटिङका खेलाडी पनि प्रारम्भिक चरणबाटै बाहिरिनु भएको थियो ।
