नेपालगन्ज / नेपालगन्ज-१ का वडा अध्यक्ष सहित उपमहानगरपालिकाका ४ अधिकृत लगायत ११ जना कोरोना जितेर डिस्चार्ज हुनुभएको छ । आजै (सोमबार) आ-आफ्नो घर फर्किदै हुनुहुन्छ ।
कोरोना विशेष अस्पताल खजुरामा भर्ना हुनुभएका अध्यक्ष रिजाल लगायत उपमहानगरपालिकाका ४ जना अधिकृतहरुलाई साउन १९ गते कोरोना पुष्टि भएको थियो । कोरोना पुष्टि पछि नेपालगन्जमा निकै ठूलो हो-हल्ला भएको थियो । अध्यक्ष रिजाललाई कोरोना लक्षण देखापरे पछि जांच गराउदा पुष्टि भएको थियो । अध्यक्ष रिजालले भन्नू भयो,” आज कोरोना जितेर घर फर्किदै छु ।”
कोरोना विशेष क्यान्सर अस्पताल खजुरा, डेन्टल र आदर्शनगर स्थित आइसोलेसनमा उपचाररत ११ जना डिस्चार्ज हुनुभएको हो । जनस्वास्थ्य फोकल पर्सन नरेश श्रेष्ठले सार्वजनिक गर्नुभएको तालिका अनुसार बाँकेमा हालसम्म ४ सय ५५ जना डिस्चार्ज हुनुभएको छ भने २ सय ७२ जना कोरोना संक्रमितहरु आइसोलेसनमा उपचाररत अवस्थामा हुनुहुन्छ ।
