बाँके । लुम्बिनी प्रदेश सांसद कृष्णा केसी (नमुना)ले राप्तीसोनारी र नरैनापुरको सुरक्षा अवस्थाको बारेमा चासो राख्नुको भएको छ । सुरक्षा अवस्थाबारे चासो राख्दै उहाँले इलाका प्रहरी कार्यालय भगवानपुरमा सो क्षेत्रका सुरक्षा अधिकारीहरूसँग छलफल गर्नु भयो ।
भगवानपुरका प्रहरी प्रमुख प्रहरी निरीक्षक राजन रायमाझी तथा मातहतका प्रहरी अधिकारीसँग पूर्वमन्त्रीसमेत रहनु भएकि सांसद नमुनाले पछिल्लो सुरक्षा अवस्थाबारे छलफल गर्नु भएको थियो । सुरक्षा अवस्थाका बारेमा जानकारी लिँदै उहाँले प्रहरीको भौतिक अवस्थाका बारेमा चासो राख्नु भएको छ ।
राप्तीसोनारी गाउँपालिका–६ र ७ तथा नरैनापुर गाउँपालिकाका सबै वडाहरू कार्यक्षेत्र रहेको इलाका प्रहरी कार्यालय भगवानपुर नरैनापुरमा यहाँको सुरक्षा अवस्था, मातहतका प्रहरी कार्यालयको भौतिक अवस्थालगायतको विषयमा छलफल भएको सांसद नमुनाले जानकारी दिनु भयो ।
पक्की सडकको पहुँच पुगेसँगै सडक दुर्घटनासमेत बढ्दै गइरहेकोमा उहाँले चासो राख्दै सडक दुर्घटना न्यूनीकरणमा प्रहरीले भूमिका खेल्नुपर्ने बताउनु भयो । ‘केही वर्षयता यो क्षेत्रमा पक्की सडक पहुँच पुगेको छ । कतिपय स्थानमा बन्ने क्रममा छन्,’ सोही क्षेत्रबाट निर्वाचित सांसद नमुनाले भन्नुभयो, ‘अब यहाँका नागरिकलाई ट्राफिक नियमसम्बन्धी प्रहरीले सचेतना दिनुपर्छ ।’
यस क्षेत्रमा पछिल्ला दिनहरूमा सवारी दुर्घटना र चोरीका घटनाहरू बढिरहेकाले जनतालाई सुरक्षाको प्रत्याभूति दिलाउन सुरक्षाकर्मीहरूलाई निर्देशन दिइएको सांसद नमुनाले बताइन् । नेपालीका ठूला चाडपर्वहरू आउँदै गरेकाले यस क्षेत्रको सुरक्षा व्यवस्था चुस्तदुरुस्त राख्न उहाँले सुरक्षाकर्मीहरूलाई आग्रह गर्नु भएको थियो ।
इलाका प्रहरी कार्यालय भगवानपुरको अत्याधुनिक भवन बनेर प्रयोगमा आइसकेको बताउँदै सांसद नमुनाले अब आफू अन्य प्रहरी चौकीको भौतिक संरचना निर्माण गर्नमा केन्द्रित रहने प्रतिबद्धता जनाउनु भयो । छलफलमा इलाका प्रहरी कार्यालय भगवानपुरका साथै त्यस मातहतका कार्यालयका प्रमुखहरूको सहभागिता रहेको थियो ।
