कैलालीको भजनीमा बाढीमा बगेर ज्यान गुमाएका परिवारलाई संघीय सरकारले राहत उपलब्ध गराएको छ । जिल्ला प्रशासन कार्यालय कैलालीमार्फत मृतकका परिवारलाई दुई-दुई लाख राहत रकम उपलब्ध गराइएको हो ।
भजनी नगरपालिकामा गत साउन १४ गते आएको बाढीमा परी ज्यान गुमाएका भजनी नगरपालिका–८ काढाँका ईश्वर शाह, चक्रबहादुर विक र स्केल चौधरीका परिवारलाई दुई-दुई लाखको चेक हस्तान्तरण गरिएको प्रमुख जिल्ला अधिकारी यज्ञबहादुर बोहराले बताउनुभयो ।
भजनीमा बाढीका कारण एक हजार ६ सय ७१ परिवार विस्थापित भएका छन । तीमध्ये केही घर फर्किए पनि अझै सयौँ परिवार हुलाकी राजमार्ग र सामुदायिक वनमा टहरा बनाएर बसिरहेका छन ।
पीडितले अझै बासस्थानमा फर्कन सक्ने अवस्था नभएकाले सरकारले उचित बासस्थानको व्यवस्था गरिदिनुपर्ने माग गर्न थालेका छन ।
-थाहा खबरबाट
