सबिता चन्द
नेपालगन्ज । बाँके क्षेत्र नं. २ मा प्रतिनिधि सभा निर्वाचन नजिकिँदै जाँदा चुनावी समीकरण तीव्र रूपमा बदलिँदै गएको संकेत देखिएको छ। पछिल्लो समय युवा उम्मेदवार दिपेन्द्र बिष्टले गरेको राजनीतिक छलाङले अन्य दलका उम्मेदवारहरूलाई हरेसमा पारेको चर्चा राजनीतिक वृत्तमा खुलेर हुन थालेको छ।
स्थानीय प्रत्यक्षदर्शीहरूका अनुसार बिष्टको नाम अहिले केवल चुनावी प्रचारमा सीमित छैन, जनजनको मुखमा स्वाभाविक रूपमा घुलमिल भइरहेको छ। चिया पसल, चौतारी, बजार र गल्लीसम्म उहाँको चर्चा हुनु आफैँमा राजनीतिक सन्देश बनेको विश्लेषकहरू बताउँछन्। क्षेत्र नं. २ अन्तर्गतका सबै २७ वडामा बिष्टको उपस्थिति र प्रभाव उल्लेखनीय रूपमा बढेको स्थानीयबासीहरूले बताउन थालेका छन्। “उहाँ घर–घर पुग्नु हुन्छ, हाम्रो कुरा सुन्नु हुन्छ, त्यसैले उहाँलाई हामीले नेता होइन, आफ्नै मान्छे जस्तै ठानेका छौँ,” एक स्थानीय वृद्धले भने।
घरदैलो अभियानका क्रममा देखिएको दृश्य झन् अर्थपूर्ण बनेको प्रत्यक्षदर्शीहरू बताउँछन्। बिष्ट टोल–बस्तीमा पुग्दा कतिपय ठाउँमा मतदाताहरूले फुलमाला र अबिर लगाएर पहिल्यै बधाई दिन थालेका छन्। औपचारिक जितभन्दा अघि नै देखिएको यस्तो व्यवहारलाई स्थानीय स्तरमा जनमतको संकेतका रूपमा लिइएको छ।
गुडन्युज खबरसँग कुरा गर्दै एक प्रत्यक्षदर्शीले भने, “अरू उम्मेदवार प्रचार गर्न आउँछन्, बिष्टज्यू चाहिँ अपनत्व लिएर आउनु हुन्छ। त्यसैले मानिसहरूले उहाँलाई जितिसकेको जस्तो व्यवहार गरिरहेका छन्।”
राजनीतिक विश्लेषकहरूका अनुसार युवा, मिलनसार र जनतासँग प्रत्यक्ष संवाद गर्ने शैली नै बिष्टको मुख्य शक्ति बनेको छ। यही कारणले परम्परागत रूपमा बलिया मानिएका उम्मेदवारहरू मानसिक दबाबमा परेको चर्चा बाहिर आएको छ। चुनावी गणितभन्दा बाहिर गएर बनेको जनताको भावनात्मक समर्थन नै बिष्टको सबैभन्दा ठूलो ‘प्लस प्वाइन्ट’ भएको उनीहरूको ठम्याइ छ।
यद्यपि चुनावी परिणाम आउन बाँकी नै छ, तर अहिले देखिएको माहोलले एउटा स्पष्ट संकेत दिएको छ—बाँके क्षेत्र नं. २ मा प्रतिस्पर्धा केवल दलबीचको मात्र छैन, यो जनताको विश्वास र अपनत्वको परीक्षा पनि हो। र, यही परीक्षामा दिपेन्द्र बिष्टले अहिलेसम्म अग्रता लिएको स्थानीयहरूको निष्कर्ष छ।
यसरी, फुलमाला र अबिरले स्वागत गरिँदै अघि बढिरहेका दिपेन्द्र बिष्टको यात्राले बाँके–२ को चुनावी इतिहासमा नयाँ मोड ल्याउने हो कि होइन, त्यसको अन्तिम फैसला मतपेटिकाले गर्नेछ। तर अहिलेका दृश्य र आवाजहरूले भने एउटै कुरा संकेत गरिरहेका छन्—बाँके–२ मा परिवर्तनको हावा तीव्र गतिमा बहिरहेको छ।
