काठमाडौं । राष्ट्रपति रामचन्द्र पौडेलले पछिल्लो राजनीतिक संकटबारे शीतल निवासमा संविधानविदहरुसँग परामर्श गर्नु भएको छ । परामर्शपछि आन्दोलनरत जेन–जी पुस्ताको मागअनुसार पूर्वप्रधानन्यायाधीश सुशीला कार्कीलाई अन्तरिम प्रधानमन्त्री बनाउने तयारी भइरहेको स्रोतले जनाएको छ ।
शीतल निवासमा संविधानविद भीमार्जुन आचार्य, विपीन अधिकारी, पूर्णमान शाक्य, चन्द्रकान्त ज्ञवाली, सूर्य ढुंगेल, ललितबहादुर बस्नेतलगायतको सहभागितामा भएको छलफल साँझसम्म चल्यो । परामर्शपछि बाहिरिएका एक संविधानविदले भन्नुभयो, “आन्दोलनकारी युवाहरुको भावनाको कदर गर्दै अन्तरिम सरकारमा उनीहरुको प्रतिनिधित्व हुनुपर्ने हामीले राष्ट्रपतिलाई सुझाव दिएका छौं । शुक्रबार बिहानसम्म सुशीला कार्की प्रधानमन्त्री बन्नुहुनेछ भन्ने आशा लिएको छु ।”
शीतल निवाससम्बन्धी हल्ला असत्य भएको स्पष्ट गर्दै उहाँहरुले भन्नुभयो, “शीतल निवासको अगाडिको भाग मात्र जलेको रहेछ । नेपाली सेनाले नयाँ भवन बचाएको छ । हामीले त्यही भवनमै राष्ट्रपतिसँग भेट गरेका हौं । राष्ट्रपति सुरक्षित हुनुहुन्छ ।”
जेन–जी पुस्ताले दलका नेताहरुलाई अस्वीकार गरेपछि राष्ट्रपति पौडेलले स्वतन्त्र र दलबाहिरको व्यक्तिलाई प्रधानमन्त्री बनाउन लागिपरेको संविधानविदहरुको दाबी छ ।
पूर्वप्रधानन्यायाधीश कार्की प्रधानमन्त्री चयन भएमा उहाँ नेपालको पहिलो महिला प्रधानमन्त्री बन्ने ऐतिहासिक उपलब्धि हासिल गर्नुहुने छ ।
