सबिता चन्द
नेपालगन्ज । नेपालगन्ज उपमहानगरपालिकामा माओवादी केन्द्रले संविधान दिवस २०८२ को अवसरमा आयोजना गरेको विशेष अन्तरक्रिया कार्यक्रममा संविधान निर्माणको ऐतिहासिक यात्रा, यसको महत्व, कार्यान्वयनका चुनौती र आगामी सम्भावनाहरूलाई गहिरो विश्लेषणसहित प्रस्तुत गरिएको छ।
कार्यक्रममा माओवादी केन्द्र बाँकेका संयोजक नरेन्द्र पाण्डे ‘जेम्स’ ले संविधानलाई “जनताको लामो संघर्ष र बलिदानको प्रतिफल”को रूपमा स्मरण गर्दै यसको प्रभावकारी कार्यान्वयनमा सबै राजनीतिक र सामाजिक पक्ष प्रतिबद्ध हुनुपर्नेमा जोड दिनुभयो। उहाँले संविधानले प्रदान गरेका अधिकारलाई ऐतिहासिक उपलब्धिका रूपमा हेर्नुपर्ने तर अझै सुधार र प्रभावकारी अभ्यासको आवश्यकतामा जोड दिनुभयो।
त्यसैगरी, माओवादी केन्द्र स्थायी कमिटी सदस्य तथा बाँके जिल्ला इन्चार्ज पुर्ण कुमारी सुवेदी ले संविधानमा समेटिएका संघीयता, धर्मनिरपेक्षता, गणतन्त्र, समावेशी समानुपातिक प्रतिनिधित्व र पूर्ण समानतामूलक निर्वाचन प्रणाली जस्ता व्यवस्थाहरू पार्टीको लामो संघर्ष र बलिदानको प्रतिफल भएको बताउनुभयो । उहाँले संविधान दिवसको अवसरलाई जनतामाझ एकता, सहकार्य र सहअस्तित्वको सन्देश प्रवाह गर्ने माध्यम बनाइ देशको समृद्धि र परिवर्तनका यात्रामा सबैले एकजुट भएर अघि बढ्न आग्रह गर्नुभयो।
कार्यक्रममा माओवादी केन्द्रका अन्य नेताहरू, लुम्बिनी प्रदेश कमिटी सह-सचिव अकल बहादुर बम, सचिव डिल्ली बराल, स्थानीय नेता, जनप्रतिनिधि, विभिन्न टोलस्तरीय समितिका पदाधिकारी तथा कार्यकर्ताहरूको उत्साहजनक सहभागिता रहेको थियो।
समापनमा आयोजक कमिटीले संविधान दिवसलाई केवल उत्सवका रूपमा मात्र नभई संवाद, समीक्षा र जिम्मेवारी बोध गर्ने दिनको रूपमा लिनुपर्ने धारणा प्रस्तुत गरेको थियो। अन्तरक्रियाले सहभागीहरूलाई संविधानको उपलब्धि र कार्यान्वयन चुनौतीबारे गहिरो आत्ममूल्यांकन र साझा प्रतिबद्धतामा उन्मुख गराएको विश्लेषकहरूले औंल्याएका छन्।
कार्यक्रमको अन्त्यमा शहीद सेतु, विक चोकमा दीप प्रज्ज्वलन गरेर संविधान दिवसलाई औपचारिक रूपमा मनाइएको थियो। यस किसिमको अन्तरक्रियाले संविधान दिवसलाई केवल औपचारिकता होइन, सांस्कृतिक, राजनीतिक र सामाजिक चेतना प्रवद्र्धनको दिनका रूपमा स्थापित गर्ने प्रयासको रूपमा मूल्याङ्कन गर्न सकिन्छ।
