नेपालगन्ज । आइतबार बिहान दाङमा भएको यात्रुवाहक बस दुर्घटानामा घाइते भएकामध्ये २७ जनाको नेपालगन्जस्थित भेरी अस्पतालमा उपचार भइरहेको छ ।
आइतबार बिहान बस दुर्घटनामा परी घाइते भएकामध्ये २७ जना विरामीलाई भेरी अस्पताल उपचारका लागि ल्याइएको र उहाँहरुको विभिन्न वार्डमा उपचार भइरहेको भेरी अस्पतालका सूचना अधिकारी एवं वरिष्ठ फिजिसियन डा. संकेत रिसालले जानकारी दिनुभयो ।
उहाँका अनुसार २७ जना घाइतेमध्ये ३–४ जना विरामीको अवस्था गम्भीर रहेको छ । अन्य विरामीको अवस्था सामान्य तथा मध्यम रहेको छ । घाइते भएकामध्ये अधिकांश महिला तथा बालबालिका रहेको उहाँले बताउनुभयो ।
अस्पतालको इमर्जेन्सी विभाग, अर्थो विभाग तथा न्यूरो विभागले विरामीलाई उपचार गरिरहेको सूचना अधिकारी डा. रिसालले जानकारी दिनुभयो । उहाँका अनुसार अधिकांश घाइतेको मुख, ढाड, टाउको, छाति, हात तथा खुट्टामा चोटपटक लागेको छ ।
बर्दियाबाट दाङ चखौरा भ्रमणका लागि जाँदैगरेको भे १ ख २०४१ नम्बरको यात्रुवाहक बस दाङको तुलसीपुर–अमिलिया सडकखण्डमा आइतबार बिहान दुर्घटना हुँदा ३५ जना व्यक्ति घाइते भएका थिए । घाइते सबै बर्दियाको बढैयाताल गाउँपालिका वडा ६ र ७ का बासिन्दा भएको प्रहरीले जनाएको छ ।