नेपालगन्ज । बाँकेको नेपालगंज क्षेत्रमा बढ्दो सवारी चापको अवस्थालाई ध्यान दिदै यात्रु बोक्ने रातो नम्बर प्लेटका इ–रिक्सा विरुद्ध सरोकारवाला निकायले कडाई गर्न थालेका छन् ।
नेपालगन्ज उपमहानगरका अनुसार नीति नियम र प्रक्रिया विपरीत गुडिरहेका रातो नम्बर प्लेटका ९३ वटा यात्रुबहाक इ–रिक्सालाई जिल्ला प्रशासन कार्यालय बाँके र ३९ वटा इ–रिक्सालाई नेपाल प्रहरी विधि विज्ञान प्रयोगशालामा अहिले ’होल्ड’ गरेर राखिएको छ ।
यातायात कार्यालयबाट कालो नम्बर प्लेट नबनाउँदासम्म ती इ–रिक्सालाई गुड्न नदिइने नेपालगंज उपमहानगरपालिकाका नगरप्रमुख प्रशान्त विष्टले बताउनुभयो । केही दिन अघि जिल्ला प्रशासन कार्यालय बाँकेमा बसेको सरोकारवालाहरुको बैठकले नेपालगञ्ज उपमहानगरपालिकाभित्र रातो नम्बर प्लेटका इ–रिक्सा यात्रु बोकेर गुड्न नपाउने निर्णय गरेको थियो।
