संवाददाता, कपिलबस्तु ।
लुम्बिनी प्रदेश सरकारका मुख्यमन्त्री कुलप्रसाद केसीले संघीयताको कार्यन्वयनको लागि संघ, प्रदेश र स्थानीय तहको बीचमा उचित तालमेल गरेर मात्रै संघीयता बलियो हुने बताउँदै संविधानले दिएको अधिकार अनुसार सरकार सञ्चालन नगरेमा संघीयता खतरामा रहेको बताउनुभएको छ ।
सोमबार प्रदेश समन्वय परिषदको छैठौ बैठकलाई सम्वोधन गर्दै कपिलबस्तुमा मुख्यमन्त्री केसीले यस्तो बताउनुभएको हो ।
उहाँले संविधानले प्रदान गरेको अधिकार सूचीलाई पालना गरी अगाडि नबढेमा देशमा सत्ता सञ्चालनमा समस्या हुने भन्दै नेपालको संविधान अनुसार सहकार्य, सहअस्तित्व र समझदारीमा सरकार सञ्चालन गर्नु पर्ने बताउनुभयो ।
मुख्यमन्त्री केसीले लुम्बिनी प्रदेश सरकारका ४ वटा गौरवका आयोजनालाई साकार पार्नका लागि निरन्तर सरकार अगाडि बढेको बताउँदै करिब २० वर्षपछि लुम्बिनी प्रदेश सबै हिसावले सुन्दर र हराभरा प्रदेश बन्न सक्ने दावी गर्नुभयो ।
उहाँले लुम्बिनी प्रदेशको राजधानी निर्माण, लुम्बिनी प्रादेशिक बिषेशज्ञ अस्पताल निर्माण, लुम्बिनी प्राविधिक विश्वविद्यालय स्थापना र पाल्पाको रामपुरदेखि रोल्पाको पाटिहाल्न सम्मको मुख्य सडक निर्माण कार्य प्राथामिकतामा रहेको जानकारी दिनुभयो ।
