संवाददाता, रोल्पा ।
लुम्बिनी प्रदेश सभाका सभामुख पूर्ण घर्तीमगरले नेपालको आमूल परिवर्तनका लागि गरिएको बलिदान, त्याग, तपस्याबाट संघीयता प्राप्त भएकोले गर्दा संघीयताको आवश्यकता मात्रै होइन्, अनिवार्यता नै भएको बताउनुभएको छ ।
रोल्पामा आयोजित पत्रकार भेटघाट कार्यक्रममा उहाँले संघीयता विरोधीहरुले संघीयता खारेजीको कुरा गरिरहेकोले त्यसका विरुद्धमा सबै राजनीतिक दलहरुको साझा एजेण्डा भएकाले त्यसको रक्षा सबै मिलेर गर्नुपर्ने बताउनुभएको हो ।
उहाँले भन्नुभयो, ‘संघीयता आम नेपाली आमाका सन्तानहरुको बलिदान, राजनीतिक दलहरुको साझा आन्दोलनबाट आएको हो त्यसैले संघीयता नयाँ शासन पद्धती भएकाले आवश्यकता छ, संघीयता विरोधीहरुले नै खारेज गर्न खोजेका छन् तर ति शक्तिको विरुद्धमा सबैले सचेत हुनुपर्दछ ।’
उहाँले नेपालमा संघीयताको खारेजी होइन कि यसमा देखिएको समस्या तथा गलत प्रवृतिलाई अन्त्य गर्दै राजनीतिक संस्कार अनुसार अगाडि बढाउनुपर्नेमा जोड दिनुभएको छ ।
संघीयतालाई कतिपय शक्तिहरुबाट असफल बनाउनतिर लागि रहेको बताउँदै अधिकारको कुरा गर्दै गर्दा सचेत नागरिकले कर्तब्यको बोध गरी संघीयतालाई बलियो बनाउनुपर्ने बताउनुभयो ।
उहाँले विगतको परिवर्तनको आन्दोलनका कारणले गर्दा समावेशी, समानुपातिक, सम्पूर्ण विभेदको अन्त्यका लागि अगाडि बढेकोले प्रणाली खराब नभएको तर प्रणालीमा रहेका मानिसहरुको कारणले गर्दा नै असफल हुने बताउनुभयो । उहाँले भन्नुभयो, ‘यो प्रणालीलाई सुधार गर्दै जाने हो तर हामी सबै जिम्मेवार भएनौ भने हाम्रै कारणले नै असफल हुन सक्छ त्यसमा सबै जिम्मेवार बनौँ ।’
आफूलाई जनताले पहिलो पटक निर्वाचित गरेको र प्रदेश सभाले सभामुखको जिम्मेवारी दिएपछि त्यसको जिम्मेवारी आरम्भमा प्रदेशसभाको जग निर्माण गर्दै कार्य सम्पादनमा व्यवस्थित गरेको बताउनुभयो ।
उहाँले संघीय संरचनामा पहिलो पटक अभ्यास भएकाले गर्दा आफूहरुले आधारभूत रुपमा कार्य कानून निर्माण, अन्य कार्य सम्पादन पनि गरी सकेको जानकारी दिनुभयो । उहाँले लुम्बिनी प्रदेश सभाको १० औं अधिवेशनसम्म आई पुग्दा ८२ वटा विधेयकहरु दर्ता भएका र ७२ वटा विधेयक पारित भएको बताउनुभयो ।
उहाँले राजनीतिक रुपमा आएका असहजताहरुले पनि लुम्बिनी प्रदेशका विषयगत समितिहरु अपूर्णता भएपनि हाल सबै राजनीतिक दलहरुमा सहमतिमा आएर पूर्णता दिइएको बताउनुभयो ।
उहाँले प्रदेश सरकारले प्रहरी ऐन, निजामति ऐन, लोकसेवा ऐन पारित भएर अगाडि बढेमा मात्रै प्रदेशको उपयोगिता हुने बताउँदै भन्नुभयो, ‘एउटा प्रहरी भर्ना नगर्न सक्ने मन्त्री, एक जनता कर्मचारी भर्ना नगर्न सक्ने प्रदेश, कर्मचारी सरुवा बढुवा गर्न संघले गर्ने हो भने प्रदेशको के काम ? त्यसैले प्रदेशको उपयोगितालाई जनतामा स्थापित गर्नेुपर्ने पर्छ ।’
उहाँले परिवर्तनका लागि तिनै शहिद, बन्दी, बेपत्ता लगायत आम जनताको योगदानले आएको बताउँदै आफूहरुले कुनै पनि राज्यसत्तामा पुगेर आफ्नो वर्ग, धरातल कसैले पनि भुल्नु नहुने बताउनुभयो ।
सभामुख पूर्ण घर्तीमगरले द्वन्द्वपीडित, शहीद परिवार, बन्दी, बेपत्ताको सम्मान तथा राहतका लागि स्थानीय तहहरुले नै सम्वोधन गर्नुपर्ने बताउनुभयो ।
पत्रकार भेटघाट कार्यक्रममा जिल्ला समन्वय समितिका प्रमुख सीता अचार्य, उपप्रमुख कर्मलाल परियार, मुख्यमन्त्रीका प्रेस संयोजक एवं नेपाल पत्रकार महासंघका निवर्तमान अध्यक्ष मानसिंह विश्वकर्मा, पत्रकार महासंघका संस्थापक अध्यक्ष काशीराम डाँगी, पूर्व अध्यक्ष खेम बुढामगर लगायत सञ्चारकर्मीहरुको थियो ।
#सभामुख_पूर्ण_घर्तीमगर
