संवाददाता ।
जापानका पूर्वप्रधानमन्त्री शिन्जो आबेको गोली प्रहार गरी भएको हमलामा निधन भएको छ । उहाँ ६७ वर्षका रहनुभएको थियो । एउटा निर्वाचन अभियानमा सहभागी हुनुभएका बेला उहाँमाथि गोली प्रहार भएको हो ।
जापानमा सबैभन्दा लामो समय प्रधानमन्त्री बन्नुभएका शिन्जो आबे आफ्नो कट्टर नीति तथा ’आबेनोमिक्स’ सङ्ज्ञा दिइएको मौलिक आर्थिक रणनीतिका कारण सधैँ चर्चामा रहनुभयो ।
सन् २०२० मा उहाँले स्वास्थ्यको कारण देखाउँदै पदत्याग गर्ने घोषणा गर्नुभएको थियो ।
यसअघि पहिलो कार्यकालमा आन्द्रासँग सम्बन्धित रोग देखिएपछि राजीनामा दिनुभएका उहाँले सन् २०२० मा आफूलाई अल्सरको गम्भीर समस्या देखिएको बताउनुभएको थियो ।
आबेका निकटतम सहयोगी योशिहिदे सुगा उहाँका उत्तराधिकारी बन्नुभएको थियो । ’द प्रिन्स’ अर्थात् ’राजकुमार’ उपनाम पाउनुभएका शिन्जो आबे राजनीतिक विरासत बोकेको परिवारका सदस्य हुनुहुन्छ ।
