सविता चन्द
नेपालगन्ज : नेपाल कम्युनिस्ट पार्टी माओवादी केन्द्रमा लामो समयदेखि सक्रिय रहनु भएको महिला नेतृ कल्पना शर्माद्वारा नेपालगन्ज उपमहानगरपालिका वडा नं ५ बाट स्वतन्त्र रुपमा वडा अध्यक्षमा उम्मेदवारी दर्ता गर्नु भएको छ । स्वतन्त्र बाट पनि जित्ने कुरामा उहाँ ढुक्क हुनुहुन्छ । 
आफुलाई २०७४ सालको स्थानीय चुनावमा पनि अर्को पटक टिकट दिने भनेर बसालिएको थियो, यसपालि पनि कुनै छलफल नगरी अर्को व्यक्तिलाई पार्टीले टिकट दिएको तर वडा नं ५ का जनताहरुले तपाईंको खाचो छ स्वतन्त्र रुपमा उम्मेदवारी दर्ता गराउनुस हामी जिताउछौं भनेर हौसला दिएको हुदा उम्मेदवारी दिएको शर्माले बताउनुभयो ।
महिला, मुस्लिम, जनजाति, अल्पसंख्यक, आदिबासी, मदेशीको पार्टी नेकपा माओवादी केन्द्र भएको तर नेपालगन्ज उपमहानगरपालिकाका २३ वटा वडामा १ जना मात्र महिला उम्मेदवार बनाएको, महिला भएकै कारण टिकट नगर कमिटीले नदिएको उहाँको आरोप छ ।
पार्टीको विधालाई आफुले पुर्ण पालना गर्ने बताउदै शर्माले भोलि आफना शुभचिन्तक तथा पार्टीका सदस्यहरुसंग बसेर छलफल गरेपछि पार्टीको वडा कमिटी अध्यक्ष लगायतका जिम्मेवार पदबाट राजिनामा दिने उहाँले बताउनुभयो ।
