संवाददाता, नेपालगंज।
सरकारले श्री कृष्ण जन्माष्टमीका दिन सार्वजनिक बिदा दिने भएको छ ।
मन्त्रिपरिषद्को बैठकले भदौ १४ गते सोमबारका दिन परेको जन्माष्टमीको दिन देशभर सार्वजनिक बिदा दिने निर्णय गरेको कानुन न्याय तथा संसदीय मामिला मन्त्री तथा सरकारका प्रवक्ता ज्ञानेन्द्रबहादुर कार्कीले जानकारी दिनुभयो ।
त्यस्तै गाईजात्रा दिन काठमाण्डौ उपत्यकामा मात्र सार्वजनिक बिदा दिइँदै आएकोमा देशभरका नेवार समुदायलाई बिदा दिने सरकारले निर्णय गरेको छ ।
यसैबीच बाँकेको नरैनापुर गाउँपालिकाले भदौ ४ गते मुस्लिम समुदायको मुहर्रम पर्वका अवसरमा सार्वजनिक विदा दिने भएको छ ।
गाउँपालिका उपाध्यक्ष जयन्ती देवी श्रीवास्तवले आज एक सूचना जारी गरी कोभिडको जोखिम कायमै रहेकाले भीड नगरी सामाजिक दुरी कायम गरी पर्व मनाउन अनुरोध गर्नुभएको छ ।
