संवाददाता ।
नियामक निकाय नेपाल धितोपत्र बोर्डका अध्यक्ष भीष्मराज ढुंगाना र सञ्चालक चन्द्र ढकाललाई निलम्बन गर्न कर्मचारी यूनियनले माग गरेका छन् ।
पहिलो पटक नेपालमा बुकबिल्डिङमार्फत् आइपीओ जारी गर्न लागेको सर्वोत्तम सिमेन्टको सेयर खरिद प्रकरणमा संलग्न भएको हुँदा यूनियनले दुवै जनाको निलम्बन माग गरेको हो ।
केही दिनयता विभिन्न सञ्चार माध्यममा बोर्डका अध्यक्ष ढुंगाना र सञ्चालक ढकालले सर्वोत्तम सिमेन्टको सेयरमा भित्री कारोबार गरेको समाचार प्रकासित भइरहेका छन् ।
बोर्डका सञ्चालक समिति सदस्य ढकालका भाइ तथा मुख्य कारोबार हेर्दै आउनुभएका आइएमई समूहका हेमराज ढकालका नाममा २ लाख कित्ता र उहाँका व्यापारिक साझेदार अम्बिकाप्रसाद पौडेलको नाममा १ लाख ५० हजार कित्ता सेयर नाम सारि गरिएको खुलेको छ ।
आज एक विज्ञप्ती सार्वजनिक गर्दै यूनियनले विभिन्न सञ्चार माध्यमहरूबाट प्रकाशित समाचारहरु र सोही परिप्रेक्षमा अर्थ मन्त्रालयबाट बोर्डको नाममा लेखिएको पत्रका सम्बन्धमा सम्बन्धित व्यक्ति वा पदाधिकारीको व्यक्तिगत विषयमा पुरै संस्थालाई मुछेर पत्र लेखिएकोमा ध्यानाकर्षण भएको जनाएको छ ।