नेपालगन्ज । लामो समय देखि विवादमा भासिदै गएको नेकपा (एमाले) को पार्टी एकता जोगाउन गठन भएको कार्दलको बैठक आज मंगलबार बस्ने भएको छ ।
दिउँसो १ बजे सिंहदरबारमा बैठक बस्ने कार्यदलका संयोजक एमाले उपाध्यक्ष भिम रावलले जानकारी दिनुभयो ।
एमाले विवाद चर्किँदै गएपछि निस्क्रिय भएको कार्यदल सोमबारदेखि पुन: जुरमुराएको हो । कार्यदलले सोमबारदेखि औपचारिकरुपमै एमालेभित्रका समस्या समाधानका लागि काम गर्न थालेको स्रोतले बताएको छ ।
सोमबार प्रधानमन्त्री तथा मन्त्रिपरिषद् कार्यालय, सिंहदरबारमा कार्यदलको बैठक बसेको थियो । बैठकमा अहिलेसम्म भएका छलफलको पुनरावलोकन भएको नेताहरुको विश्लेषण छ ।
कार्यदलमा अध्यक्ष केपी शर्मा ओलीका तर्फबाट सुवास नेम्वाङ संयोजक हुनुहुन्छ भने सदस्यहरुमा विष्णुप्रसाद पौडेल, प्रदीप ज्ञवाली, शंकर पोखरेल र विष्णु रिमाल लगाएतका नेताहरू हुनुहुन्छ । वरिष्ठ नेता माधवकुमार नेपालका तर्फबाट भीम रावल संयोजक हुनुहुन्छ भने सदस्यहरुमा सुरेन्द्र पाण्डे, घनश्याम भुसाल, गोकर्ण विष्ट र रघुजी पन्त हुनुहुन्छ ।
