संवाददाता ।
नेपाली अभिनेत्री श्वेता खड्काले विजयेन्द्रसिंह रावतसँग बिहे गर्नुभएको छ । परिवार र नजिकका आफन्तबीच उहाँले आज काठमाडौंमा बिहे गर्नुभएको हो ।
अभिनेता श्रीकृष्ण श्रेष्ठको निधन भएको ६ वर्षपछि उहाँ बिहे गर्ने निर्णयमा पुग्नुभएको हो । श्वेतासँग बिहे भएको २ दिनमै श्रीकृष्ण बिरामी हुनुभएको थियो ।
उपचारकै क्रममा २०७१ साउन २५ गते उहाँको निधन भएको थियोे । कोभिडका कारण सिमित मानिसहरुको उपस्थिति बीच आफूले नविन यात्रा थाल्ने भन्दै उहाँले बिहेको एक दिनअघि फेसबुक स्टाटसमा उल्लेख गर्नुभएको थियो ।
आइतबार उहाँले मेहेन्दीका तस्बिरहरू सार्वजनिक गर्नुभएको थियो ।
यतिखेर सामाजिक सञ्जालमा श्वेतालाई बधाई दिनेको ओइरो लागेको छ । श्वेताले श्रीकृष्णसँगै ’कहाँ भेटिएला’ मा अभिनय गरेर चलचित्र क्षेत्रमा प्रवेश गर्नुभएको थियो ।
’कोहिनुर’, ’कान्छी’ उहाँले अभिनय गरेका फिल्महरु हुन् । अभिनयसँगै व्यवसायमा व्यस्त श्वेता समाजसेवी पनि हुनुहुन्छ ।
#श्वेता खड्का #विजयेन्द्रसिंह रावत
इकान्तिपुरबाट
