नेपालन्ज । विश्वमा कोरोना भाइरसको सङ्क्रमणबाट ज्यान गुमाउनेको सङ्ख्या १५ लाख १० लाख नाघेको छ ।
दुई सय १८ वटा देशमा फैलिएको कोरोना भाइरसको सङ्क्रमणबाट अहिलेसम्म १५ लाख १० हजार सात सयभन्दा धेरैको ज्यान गएको वर्ल्डोमिटरले जनाएको छ । अहिलेसम्म विश्वका ६ करोड ५४ लाख ९६ हजारभन्दा धेरैमा सङ्क्रमण पुष्टि भइसकेको छ ।
सङ्क्रमण भएकामध्ये चार करोड ५३ लाख ३७ हजारभन्दा धेरै निको भएका छन् । सबैभन्दा धेरै अमेरिकामा एक करोड ४५ लाख २९ हजारभन्दा धेरैमा कोरोना सङ्क्रमण पुष्टि भएकोमा दुई लाख ८२ हजार सात सयभन्दा धेरैको ज्यान गइसकेको छ ।
प्रभावितको दोस्रो नम्बरमा रहेको भारतमा ९५ लाख ६४ हजार पाँच सयभन्दा धेरैमा सङ्क्रमण पुष्टि भएकोमा एक लाख ३९ हजार एक सयभन्दा धेरैले ज्यान गुमाएका छन् ।
विश्वका १३ वटा देशमा १० लाखभन्दा धेरै मानिसमा कोरोना भाइरसको सङ्क्रमण पुष्टि भएको छ ।
गएको वर्षको डिसेम्बरमा चीनको वुहानमा देखिएको कोरोना भाइरस अहिले विश्वव्यापी महामारीको रुपमा रहेको छ । पछिल्ला दिनमा धेरै देशहरुमा महामारीको दोस्रो लहर चलिरहेकोले अहिले नयाँ सङ्क्रमित थपिने तथा ज्यान गुमाउनेको सङ्ख्या पनि बढिरहेको छ ।
यसैबीच कोरोना भाइरसविरुद्ध बनिरहेको खोपले पाएको सफलताले भने आशा बढ्दै गएको छ । बुधबार मात्रै फाइजर कम्पनीले बनाएको कोरोना खोपलाई बेलायतले प्रयोगका लागि अनुमति दिएको छ । एजेन्सी
