-पत्रकार सम्मेलनमा जिल्ला प्रहरी कार्यालय बाँकेका प्रमुख प्रहरी उपरिक्षक (एसपी) ओम बहादुर राना लगायत ।
जंगली जनावर (चित्तल) मारेको आरोपमा बाँके प्रहरीले दुई जना ब्यक्तिलाई पक्राउ गरी सार्वजनिक गरेको छ । पक्राउ पर्नेमा राप्तीसोनारी ६ का २३ बर्षिय सामेल रोका, नेपालगंज ६ का २८ बर्षिय अन्जान हमाल रहेका छन ।
उनीहरु भे ८ प ५४६५ नम्बर मोटर साइकल सहित पक्राउ परेका हुन । यसमा समलग्न अर्का एक जना राप्ती सोनारी ६ ढलैयाका रामु वलीको खोजी कार्य शुरु भएको प्रहरीले जनाएको छ ।
इलाका प्रहरी कार्यालय बनकट्टी (क), अस्थायी प्रहरी पोष्ट फत्तेपुरबाट गएको प्रहरी टोलीले डुडुवा ४ राप्ती नदी पुलमा करिब २५ किलोको पोथी चित्तल मारी नेपालगंज तर्फ ल्याउदै गर्दा फेला परेको थियो । चित्तल मारेर ११ हजार रुपैंयामा खरिद विक्री भएको खुलेको छ ।
कानुनी ब्यबस्था अनुसार दोषी ठहर भए राष्ट्रिय निकुन्ज तथा वन्यजन्तु संरक्षण ऐन २०२९ को दफा २६ (क) बमोजिमको १० लाख रुपैंया सम्म जरिवाना र ५ वर्ष देखी १० वर्ष सम्म कैद वा दुवै सजाय हुन सक्ने छ ।
यसैगरी कटुवा पेस्तोल, ५ राउण्ड गोली सहित २ जना मानिस पक्राउ परेका छन । पक्राउ पर्नेमा नेपालगंज २० मनिकापुरका ६२ बर्षिय सलिम नाँउ र नेपालगंज १९ बनघुस्राका ३३ बर्षिय ईब्राहिम बेहना रहेका छन ।
इलाका प्रहरी कार्यालय भगवानपुरबाट प्रहरी निरीक्षक बसन्त गौतमको कमाण्डमा खटिएको प्रहरी टोलीले नरैनापुर गाउँपालिका ५ सर्वराजपुरुवा स्थित हुलाकी राजमार्गको सडक खण्डमा हातहतियार ओसारपसार गरिरहेको उनीहरुलाई नियन्त्रणमा लिएको हो ।
अब उनीहरुलाई मुलुकी अपराध संहित ऐन २०७४ को परिच्छेद ५ दफा १३२ बमोजिमको ५ बर्ष सम्म कैद र ५० हजार रुपैया सम्म जरिवाना हुन सक्ने प्रहरीले जनाएको छ ।
बाँके प्रहरीले आज सार्वजनिक गरेको घटना विवरण अनुसार २ महिना देखी अपहरणमा परेकी १७ बर्षिय बालिकाको सकुशल उद्दार गरिएको छ ।
प्रहरी निरीक्षक ह्देश कुमार सापकोटाको कमाण्डमा खटिएको प्रहरी टोलीले भारतको उत्तर प्रदेश जिल्ला गौतम बुद्ध नगर, थाना बादलपुर दुजानामा बन्धक बनाई राखेको अवस्थामा भारतीय प्रहरी सँग समन्वय गरी बालिकाको उद्दार गरिएको हो ।
बालिकालाई अपहरण गर्ने बढैयाताल गाउँपालिका वडा नम्बर ७ का २१ बर्षिय मुकेश यादव, सोही ठाउँका ५५ बर्षिय हरिराम अहिरलाई प्रहरीले पक्राउ गरेको छ । सोही ठाउँका ३५ बर्षिय अगलेश यादव भने फरार रहेको प्रहरीले जनाएको छ ।
अब पक्राउ परेका ब्यक्तिहरुलाई मुलुकी अपराध संहिता ऐन २०७४ को अपहरण लिन नहुने महलको परिच्छेद १७ दफा २१४ बमोजिम १० बर्ष देखी १५ बर्ष सम्म कैद र १ लाख देखी १ लाख ५० हजार रुपैंया सम्म जरिवाना हुने कानूनी ब्यवस्था रहेको प्रहरीले जनाएको छ ।
