संवाददाता, नरैनापुर बाँके ।
पहिले सुगम जिल्लाको दुर्गम क्षेत्रका रुपमा परिचित बाँकेको बगौैडा क्षेत्रमा अहिले पक्की सडक पुगेको छ । नेपालगंज देखी ४४ किलोमिटर टाढा रहेको सुईया गाउँमा सडक मात्र नभई बिद्युत पनि पुगेपछि स्थानिय खुसी भएका छन ।
विद्युत मुख्य सडक सम्म पुगेपनि अब भित्री गाउँहरुमा विस्तारका लागी स्थानीय बासी र सरोकारवाला निकायले थप पहल गर्नुपर्ने देखिएको छ ।
आउजाउका लागी गाडी, मोटर साइकलमा तीन, चार घण्टा सम्म लाग्ने ठाउँमा अहिले पक्की सडक बनेपछि नेपालगंजबाट डेढ दुई घण्टामै सहजै सुईया र आसपासका ठाउँमा पुग्न सकिन्छ ।
सुईया गाउँमा विद्युत विस्तारको काम भईरहेको छ भने त्यहाँका वरपरका ठाउँमा विस्तारको काम सकिएको छ । तर अन्य ठाउँमा सडक राम्रो नै भए पनि सुईया गाउँमा भने सडक निर्माण गर्ने ठेकदार कम्पनीले थोरै लापरवाही गरेको पाईएको छ ।
अहिले पनि सुईया गाउँ जोड्ने सडकमा अलकत्रा बिनाको मसिनो कालोपत्रे गर्ने गिट्टी मात्र छरिएको छ । यद्धपी दुर्गम भनेर पहिले राप्ती पुल पारी आउजाउ गर्न कठिन मान्नेहरु हिजोआज दैनिक जसो आउजाउ गरिरहेको पाईन्छ ।
