संवाददाता, नेपालगन्ज
३१ साउन २०७७ ।
गएको २४ घण्टामा नेपालमा कोरोनाभाइरसको सङ्क्रमणबाट थप तीन जनाको मृत्यु भएको र ४६८ जना बिरामी भएको स्वास्थ्य तथा जनसङ्ख्या मन्त्रालयले शनिवार जनाएको छ । यो वृद्धिसँगै कोभिड- १९ बाट मृत्यु हुनेको सङ्ख्या १०२ पुगेको छ भने सङ्क्रमित व्यक्तिहरूको सङ्ख्या २६,०१९ पुगेको छ ।
मन्त्रालयका प्रवक्ता डा. जागेश्वर गौतमका अनुसार अहिले ८,१९३जनामा सक्रिय सङ्क्रमण छ भने १७,२०१ जना भाइरसमुक्त भएका छन् ।
गएको नौ दिनमा नेपालमा कोरोनाभाइरस सङ्क्रमणबाट मृत्यु हुनेको सङ्ख्या ४२ छ ।
सबैभन्दा बढी सक्रिय सङ्क्रमित प्रदेश नं. २ मा ३,८२७ जना र बागमती प्रदेशमा २,००२ जना रहेका छन् । त्यस्तै प्रदेश नं. १ मा ८९४ जना, गण्डकी प्रदेशमा २६२ जना, प्रदेश नं. ५ मा ७३६ जना, कर्णाली प्रदेशमा २२५ जना र सुदूरपश्चिम प्रदेशमा ८१० जना सक्रिय सङ्क्रमित रहेका छन् ।
शनिवार पुष्टि गरिएका तीनै मृतक पुरुष हुन् । कपिलवस्तुका ४० वर्षीय पुरुषको शनिवार बिहान मृत्यु भएको हो । त्यस्तै पर्साका ६० वर्षीय पुरुष र धनुषाका ५० वर्षीय पुरुषको शुक्रवार मृत्यु भएको डा. गौतमले बताउनुभयो ।
गएको २४ घण्टामा ११,०४७ वटा पीसीआर परीक्षण गरिएको छ । हालसम्म ५०५,६६० जनाबाट सङ्कलित नमुनाको पीसीआर विधिबाट परीक्षण गरिएको मन्त्रालयले जनाएको छ । सो अवधिमा १२४ जना रोगमुक्त प्रमाणित भएका थिए । अहिले देशभरि क्वारन्टीनमा १४,४४८ जना छन् ।
