नेपालगन्ज । नसर्ने रोग (NCD)- मधुमेह, उच्च रक्तचापजस्ता दीर्घ रोगहरू आज समाजका हरेक घर–आँगनसम्म फैलिँदै गएका छन् । यिनै रोगहरूको समयमै पहिचान, उपचार र जनचेतनाका लागि समुदायस्तरमै पुगेर गरिएको सेवा नै साँचो अर्थमा जनस्वास्थ्यको आधार हो । यही मान्यतालाई व्यवहारमा उतार्दै नेपालगन्ज नर्सिङ कलेजले खजुरा गाउँपालिकास्थित खजुरा प्राथमिक स्वास्थ्य केन्द्रमा समुदायस्तरको नसर्ने रोग (NCD) स्क्रिनिङ, उपचार तथा परामर्श शिविर सफलतापूर्वक सञ्चालन गरेको छ ।
शिविरको प्रमुख अतिथिका रूपमा उपस्थित डा. राजन पाण्डेले नसर्ने रोगहरू ‘चुपचाप फैलिने महामारी’ भएको उल्लेख गर्दै समयमै स्क्रिनिङ र जीवनशैली सुधार नै यसको प्रभावकारी समाधान भएको बताउनु भ्यो । “अस्पताल कुर्नु होइन, अस्पताल जनताकहाँ पुग्नुपर्छ भन्ने अवधारणाको यो उत्कृष्ट उदाहरण हो,” उहाँले भन्नुभयो ।
कार्यक्रममा समुदायमा सेवा नेपालगन्ज नर्सिङ कलेजकी प्रमुख सुनिता आचार्यले नर्सिङ शिक्षालाई केवल कक्षा र प्रयोगशालामा सीमित नराखी समुदायसँग जोड्नु नै कलेजको मूल उद्देश्य भएको स्पष्ट पार्नुभयो । “नर्सहरू समाजका पहिलो स्वास्थ्य सल्लाहकार हुन् । समुदायमा पुगेर सेवा दिन पाउनु हाम्रा विद्यार्थीका लागि पनि जीवनभरको सिकाइ हो,” उहाँको भनाइ थियो ।
शिविरमा तुलसा सहित सम्पूर्ण नर्सिङ कलेज परिवारको सक्रिय सहभागिता रहेको थियो । नर्सिङ विद्यार्थी र स्वास्थ्यकर्मीहरूले स्थानीय नागरिकहरूको रक्तचाप, रक्तसकर (सुगर) परीक्षण गर्नुका साथै रोगसम्बन्धी परामर्श, औषधि सेवनको विधि, खानपान र जीवनशैली सुधारबारे व्यवहारिक सुझाव दिएका थिए ।
स्थानीय बासिन्दाहरूले घरआँगनमै यस्तो सेवा पाउँदा खुसी व्यक्त गर्दै यस्ता कार्यक्रम नियमित रूपमा हुनुपर्ने माग गरेका छन् । धेरै नागरिकले पहिलो पटक आफ्नो स्वास्थ्य अवस्था थाहा पाएको प्रतिक्रिया दिएका छन्, जसले शिविरको महत्त्वलाई अझ पुष्टि गरेको छ ।
नसर्ने रोग नियन्त्रणका लागि चेतना, निरन्तरता र सहकार्य अपरिहार्य छ । नेपालगन्ज नर्सिङ कलेजको यो पहल केवल एक शिविर मात्र होइन, समुदायमा स्वास्थ्य चेतनाको दीप प्रज्वलन हो । यस्ता कार्यक्रमले स्वस्थ समाज निर्माणतर्फ आशाको उज्यालो बाटो देखाएका छन् ।
