प्रेम विश्वकर्मा, बाँके ।
बाँकेको नेपालगंज उपमहानगरपालिका अन्र्तगत पर्ने २३ वटै वडामा पहिचान गरिएका ८ हजार ७ सय ११ जना गरिब परिवारलाई गरिब परिचय–पत्र वितरण गरिदै छ ।
नेपाल सरकार, भूमि ब्यवस्था सहकारी तथा गरिबी निवारण मन्त्रालयले रातो, निलो र पहिलो गरी ३ किसिमको गरिब परिचय–पत्र उपलब्ध गराएको हो । जसको अर्थ अति गरिब, मध्यम गरिब र सामान्य गरिब भन्ने बुझिन्छ ।
मन्त्रालयले पठाएको गरिब परिचय–पत्रलाई उपमहानगरपालिका र मातहतका वडा कार्यालय मार्फत प्रमाणित गरेर वितरण गर्ने कार्य अहिले चलिरहेको छ ।
गरिब परिचय–पत्रको संख्याका आधारमा नेपालगंजका २३ वडा मध्ये वडा नम्बर २१, १३, १९, २२, १५, १६ मा धेरै गरिब परिचय–पत्र वितरण गरिदै छ ।
नेपालगंज उपमहानगरपालिकाका सूचना प्रविधि अधिकृत घनश्याम बर्माले गरिब परिचय–पत्रका सम्बन्धमा देखिएका कमजोरी, आएका गुनासाहरुलाई अहिले टिपेर राख्ने गरिएको भन्दै कमजोरी, गुनासो सुनुवाईका लागी सम्बन्धित ठाउँमा पठाईने जानकारी दिनुभयो ।
अहिले गरिब परिचय–पत्र वितरण गर्न आफुहरुले सहजीकरण मात्र गरेको नेपालगंज उपमहानगरपालिका वडा नम्बर १५ का वडा अध्यक्ष मदन विक्रम शाहले जानकारी दिनुभयो । वडामा तीन दिन यतादेखी गरिब परिचय–पत्र वितरणको कार्य चलिरहेको उहाँको भनाइ छ ।
गरिब परिचय–पत्रको सदुपयोग भने तोकिएको समयावधि भित्र मात्र गर्न सकिनेछ ।
