नेपालगन्ज । नेपाल पत्रकार महासंघको निर्वाचन यथाशिघ्र गर्न प्रेस सेन्टर नेपाल लुम्बिनी प्रदेशले माग गरेको छ ।
साेमबार दाङमा सम्पन्न संगठनको बैठकले विविध बहानामा महासंघको निर्वाचन सारिनु गलत भएको निष्कर्ष निकाल्दै यथाशिघ्र निर्वाचन गर्न माग गर्ने निर्णय गरेको सेन्टरका लुम्बिनी प्रदेश अध्यक्ष मानसिंह विकले जनाकारी दिनुभयो । “प्रदेशका १२ वटै जिल्लाबाट प्रतिनिधित्व गर्ने केन्द्रीय पदाधिकारी तथा सदस्य, प्रदेश समिति, जिल्ला इन्चार्ज, अध्यक्षसहितको उपस्थितिमा सम्पन्न बैठकले श्रमजीवी पत्रकारको छाता संगठन पत्रकार महासंघको निर्वाचन समयमै नहुनुले यसको गरिमामाथि नै प्रश्न उठ्न सक्ने तर्फ सचेत हुन केन्द्रिय नेतृत्वलाई दवाव दिने निर्णय गरेको छ” अध्यक्ष विकले भन्नुभयो, “हामी इमान्दारिताका साथ शुद्धिकरण अभियानलाई टुंगोमा पुर्याउने र जस्तोसुकै त्याग गरेर भएपनि यथाशिघ्र महासंघको निर्वाचन गर्ने कुरामा प्रतिबद्ध छौँ, सोही अनुसार केन्द्रिय नेतृत्वलाई दवाव दिन्छौं ।”
बैठकमा बोल्दै नेकपा माओवादी केन्द्रका लुम्बिनी प्रदेश सचिव तथा प्रेस सेन्टर नेपाल लुम्बिनी प्रदेशका फ्र्याक्सन इन्चार्ज कृष्ण कुमार अधिकारी (प्रकाश) ले १२ वटै जिल्लाबाट एकताका साथ निर्वाचनमा लाग्न निर्देशन दिनुभयो । उहाँले पार्टीको नयाँ बिधान अनुसार संगठनहरूलाई नयाँ बिचारकाे संश्लेषण सहित विधि निर्माणकाे प्रयास भइरहेको समेत बताउन छुटाउनु भएन । संगठन निर्माणमा नेता कार्यकर्ताकाे इमान्दारिताकाे मूल्याङ्मन विधि सहित प्रेस सेन्टरलाई अन्य संगठन भन्दा राम्रो र फरक खालकाे बनाउन सुझाव दिनुभयो ।
त्यसैगरी सेन्टरका केन्द्रिय उपमहासचिव यानेन्द्र जिसीले श्रमजीवी पत्रकारको हकहितमा लड्ने संस्थालाई विवादित गराउने कार्यमा कोही पनि संलग्न नहुन आग्रह गर्नुभयो । उहाँले भन्नुभयो, “पत्रकार महासंघ रातारात बनेको संस्था होइन, यसलाई संस्थागत गर्न अग्रजले गरेको त्याग र यसको गरिमाको बारेमा महासंघको नेतृत्वले नजरअन्दाज गर्न मिल्दैन ।”
बैठकले लुम्बिनी प्रदेश सरकारलाई संचारमाध्यम सुचिकृत गर्ने कार्य आर्थिक वर्षको सुरुवात संगै सुरू गर्न अनुरोध गर्ने निर्णय गरेको जनाइएको छ । “संचारमाध्यम सुचिकृत गर्ने र लोककल्याणकारी सूचना आर्थिक वर्षको उत्तरार्धमा गर्ने कार्य गलत छ” सेन्टरका वरिष्ठ परदेश उपाध्यक्ष रुद्रहरी कुंवरले भने , “बैठकले पत्रपत्रिका, रेडियो, टेलिभिजनसंगै अनलाइनलाई पनि सुचिकृत गर्न र लोककल्याणकारी विज्ञापन उपलब्ध गराउन आग्रह गर्ने निर्णय भएको छ, संगठनले त्यसको लागि पहल गर्छ ।”
बैठकमा १२ वटै जिल्लाका जिल्ला इन्चार्ज, अध्यक्षले आगामी निर्वाचनको लागि जिल्लाले गरेको तयारीबारे ब्रिफिंग गरेका थिए ।
आसन्न महासंघको निर्वाचनको तयारीमा जुट्न बैठकले जिल्ला शाखालाई निर्देशन दिएको संगठनले जनाएको छ ।
