नेपालगन्ज । बाँकेको खजुरा गाउँपालिकामा गाई र भैँसी दुहुनो भएपछि किसानलाई प्रोत्साहन भत्ता उपलब्ध गराउन थालिएको छ । भत्ता उपलब्ध गराउन थालिएपछि पशुपालनतर्फ किसानको रुची बढ्न थालेको हो ।
खजुरा गाउँपालिकाले गत आर्थिक बर्ष २०७९–८० देखि सुत्केरी पशु स्याहार तथा प्रोत्साहन भत्ता कार्यक्रम सञ्चालनमा ल्याएको हो । गाउँपालिकाका अध्यक्ष डम्बरबहादुर बिकले गत आ.व.मा एक हजार एक सय १५ किसानहरु गाईभैंसी सुत्केरी भएपछि प्रोत्साहन रकमका लागि गाउँपालिकाको सम्पर्कमा आएको जानकारी दिनुभयो ।
किसानले प्रतिपशु सुत्केरी भएपछि एक हजार ५ सय रुपियाँ प्रोत्साहनस्वरुप प्राप्त गर्ने गरेका छन् । पशु सुत्केरी भएपछि सप्रमाण वडा कार्यालयको सिफारिसका आधारमा पशु शाखाले किसानलाई रकम उपलब्ध गराउने गरेको छ ।
तर चालु आ.व.को साउन र भदौ महिनामा गाई र भैँसी सुत्केरी भएको प्रमाणसहित चारसय किसान प्रोत्साहन रकमका लागि पालिकाको सम्पर्कमा आइसकेका छन् । अध्यक्ष विकले भन्नुभयो, ‘गतवर्ष पहिलो पटक कार्यक्रम सुरु भएका कारण पनि जानकारीको अभावमा किसानहरु छुटेका हुन सक्छन्, तर यसबर्ष अहिलेसम्मको तथ्याङ्क हेर्ने हो भने किसानको सङ्ख्या अधिक भएको छ ।’
गतवर्ष पालिकाले प्रोत्साहनबापत रकम दिन थालेपछि किसानमा उत्साह थपिएको र समग्रमा पशुपालन गर्नेहरु बढ्दैगएको पालिकाले जनाएको छ । खजुरा गाउँपालिका पशु शाखा प्रमुख तारा थापाले चालु आ.व.मा यो कार्यक्रमलाई निरन्तरता दिँदै २० लाख बजेट विनियोजन गरिएको जानकारी दिनुभयो ।
