नेपालगन्ज । बाँके स्थित नागरिक समाजको तर्फबाट नेपालगन्जमा सामाजिक सद्भाव कायम गर्न अपिल गरिएको छ । केही दिन यता नेपालगञ्जमा बढिरहेको धार्मिक तनावले नेपालगञ्जको सामाजिक सद्भावमा खलल पुगेको उल्लेख गर्दै नागरिक समाजका तर्फबाट अपिल गरिएको हो। नागरिक समाजका प्रतिनिधिमुलक संस्थाहरुले तर्फबाट बिज्ञप्ती जारी गर्दै उक्त अपिल गरिएको हो ।
जारी बिज्ञप्तीमा सामाजिक संजालमा लेखिएको स्टाटस, सो स्टाटस बिरुद्ध असोज १४ गते मुस्लिम समुदायले गरेको बिरोध र्याली, असोज १६ गते ओमकार परिवार हिन्दु समाजले निकालेको र्यालीका क्रममा बिबाद उत्पन्न भई नेपालगञ्ज उपमहानगरपालिका क्षेत्रमा झडप लगायतका घटनाहरु घट्नु दुःखद रहेको उल्लेख छ ।
बिभिन्न प्रतिनिधिमुलक संघ, संस्थाका प्रमुख तथा प्रतिनिधिहरुले सामाजिक सद्भाव एवम् धार्मिक सहिष्णुता खल्बलिन नदिन कानुन बिपरितका कार्य गर्ने जो कोहिलाई कानुनी कठघरामा ल्याउन, नागरिकहरुको जिउधनको सुरक्षा गर्न प्रहरी, प्रशासनसङ्ग जोडदार माग गरिएको छ ।
जारी बिज्ञप्तीमा बिभिन्न धर्मका धर्मगुरु, अगुवा, नागरीक समाजका अगुवा, जनप्रतिनिधि, प्रहरी, प्रशासन लगायतलाई सामाजिक सद्भाव कायम गर्नका लागि नेतृत्वदायी भुमिका निर्वाह गर्न आग्रह गरिएको छ ।
बाँकेका बिभिन्न ठाउँहरुमा भएको झडपका क्रममा भएको सम्पत्ति तोडफोडको मुल्यांकन गरि तत्काल क्षतिपुर्तिको व्यवस्था गर्न पनि बिज्ञप्ती मार्फत माग गरिएको छ ।
झडपका क्रममा घाईते भएका व्यक्तिहरुको निःशुल्क उपचार गर्ने व्यवस्था मिलाउन अपिल गर्दै बिज्ञप्तीमा अवस्था सहज हुँदै गएपनि सर्बसाधारणको सुरक्षामा पर्न सक्ने सम्भावित जोखिम एबं शान्ति भंग हुन जाने स्थितीलाई मध्येनजर गर्दै उच्च सुरक्षा सर्तकता अपनाउन प्रहरी, प्रशासनसँग जोडदार माग गरिएको छ । संबेदनशिल क्षेत्रहरुमा सुरक्षा व्यवस्थालाई कडा पार्न, साईवर अपराध सम्वन्धी कानुनको प्रभावकारी कार्यान्वयनका साथै सामाजिक सञ्जालका माध्यमबाट भईरहेको अराजकतालाई नियन्त्रण, नियमन गर्न सम्बन्धित निकायसँग जोडदार माग गर्ने जस्ता कुरा बिज्ञप्तीमा उल्लेख गरिएको छ ।
नागरिक समाजको तर्फबाट बिज्ञप्ती जारी गर्नेहरुमा नागरिक सरोकार समिति, बाँकेका संयोजक कृष्ण प्रसाद श्रेष्ठ, बरिष्ठ पत्रकार पूर्णलाल चुके, नेपालगञ्ज उपमहानगरपालिका, बाँकका पूर्ब उपप्रमुख उमा थापा मगर, नेपालगञ्ज उद्योग बाणिज्य संघ बाँकेका अध्यक्ष टंक धामी, अध्यक्ष, गैर सरकारी संस्था महासंघ नेपालका केन्द्रीय सदस्य नमस्कार शाह, धर्मलाल रोकाय, उच्च अदालत बार एसोसिएसन, नेपालञ्जका अध्यक्ष चित्र बहादुर शाही, अधिकारकर्मी रबिन्द्र कर्ण, , गैर सरकारी संस्था महासंघ, नेपाल, बाँकेका अध्यक्ष चन्द्र प्रसाद तिमिल्सिना, थर्ड एलायन्स, नेपालगञ्जका प्रमुख आलम खान, नेपाल घरेलु तथा साना उद्योग महासंघ, बाँकेका अध्यक्ष मधु खड्का, फातिमा फाउण्डेसन, नेपालगञ्ज, बाँकेका अध्यक्ष मैमुना सिद्धिकी, नेपाली उपभोक्ता संरक्षण महासंघ, बाँकेका अध्यक्ष डा. बिनोद कर्ण, मिलाप, नेपालगञ्जका अध्यक्ष रमेश राज रेग्मी, ड्युकम नेपालका अध्यक्ष मुस्ताक अलि राई, सामाजिक अभियन्ता साहिल अन्सारी, महिला जागृती शेल, नेपालगञ्जका अध्यक्ष लक्ष्मी श्रेष्ठ, धम्बोझी मा.बि. नेपालगञ्जका पूर्ब प्राचार्य किरण आचार्य, बास नेपालका केन्द्रीय कार्यबाहक अध्यक्ष शिब कुमार बर्मा, नेपाल घरेलु महासंघ, नेपालगञ्ज उपमहानगरपालिकाका अध्यक्ष दिला शाह रहेका छन।
