नेपालगन्ज ।
सर्पदंशमा परेर बिरामी भएका प्युठानका एकैघरका दुई दिदीभाई निको भएर अस्पतालबाट डिस्चार्ज भएका छन् उपचारमा संलग्न डाक्टरलाई सम्मानित गरिएको छ ।
समयमै उद्दार र सफल उपचार गरेको भन्दै भेरी अस्पताल नेपालगन्जमा कार्यरत वरिष्ठ कन्सल्टेन्ट एनेस्थेसियोलोजिष्ट डाक्टर कृष्ण प्रसाद आचार्यलाई प्युठान नगरपालिका वडा नम्बर १, खैरा प्युठानका सर्पदंशमा परेका बालबालिकाका आफन्त तथा अभिभावकद्वारा डाक्टर आचार्यलाई आइतबार भेरी अस्पताल नेपालगन्जमा सम्मानित गरिएको हो ।
गत असार २५ गते बिहान ४ बजेको समयमा प्युठान नगरपालिका वडा नम्बर १, खैरा प्युठानका दिदीभाई १५ बर्षिया करीना बस्नेत र १० बर्षिय करन बस्नेतलाई बिस्तारामा सुतेकै समयमा सर्पले टोकेको थियो ।
सर्पले टोके पश्चात् उपचारका लागि उनिहरुलाई प्युठान जिल्ला अस्पताल बिजुवार लगिएको थियो । प्युठानमा उपचार असम्भव देखिएपछि प्युठान अस्पतालका डाक्टरहरुले भेरी अस्पताल नेपालगन्जमा कार्यरत डाक्टर कृष्ण प्रसाद आचार्यसँग समन्वय गरी डाक्टर आचार्यकै सरसल्लाह अनुसार उनिहरुलाई नेपालगन्ज ल्याइएको थियो ।
डाक्टर आचार्य विरामी बालबालिकाहरुको उपचारका लागि नेपालगन्जबाट दाङको घोराहीसम्म पुग्नु भएको थियो । घोराहीबाट एम्बुलेन्स मै उपचार गर्दै थप उपचारका लागि उनिहरुलाई भेरी अस्पताल नेपालगन्ज ल्याइएको थियो ।
डाक्टर आचार्यकै रेखदेखमा उनिहरुको नेपालगन्जमा सफल उपचार सम्भव भएको युवा समाजसेवी नवीन शर्माले बताउनु भएको हो । बिरामी दिदीभाई सफल उपचार पश्चात् निको भइ आजै अस्पतालबाट डिस्चार्ज भएर प्युठान पठाइएको शर्माले जानकारी दिनु भएको छ।
सम्मान कार्यक्रममा बिरामीका आफन्त, अभिभावक तथा प्युठानबाट नेपालगन्ज आई विभिन्न पेशा व्यवसाय गर्ने व्यक्तिहरूको उपस्थिति रहेको थियो ।
