संवाददाता ।
राष्ट्रिय स्वतन्त्र पार्टीका सभापति रवि लामिछानेले आफूलाई मुद्दामाथि मुद्दा हालेर सिध्याउने षड्यन्त्र भइरहेको बताउनुभएको छ ।
चितवन क्षेत्र नम्बर २ को उपनिर्वाचनमा उम्मेदवार बन्नुभएका लामिछानेले भरतपुरमा आयोजित कोणसभालाई सम्बोधन गर्दै जति मुद्दा हाले पनि आफू नडराउने बताउनुभयो ।
‘जताजता मुद्दा हाल्नुपर्छ हाले हुन्छ, देशमा हालेर पुग्दैन भने विदेशमा पनि हाले हुन्छ’, लामिछानेले भन्नुभयोे, ‘म यस्ता मुद्दाबाट डराउनेवाला छैन । ५ वर्षपछि राष्ट्रिय स्वतन्त्र पार्टीको एकल सरकार कसैले रोकेर रोकिने वाला छैन ।’
आफूले पुराना भ्रष्टाचारको फाइल खोल्ने भनेर संसदमै उद्घोष गरेकाले आफूलाई सिध्याउन भएभरको स्रोत साधन लगाइएको लामिछानेको आरोप छ । आफूले कुनै अपराध नगरेको भन्दै उहाँले आफ्नो अवस्थाबारे कुनै नलुकाइ इमानदारिता पूर्वक बताएको उल्लेख गर्नुभयो ।
आफूहरूले हत्या, हिंसा नगरी, टायर नबली शान्तिपूर्ण विद्रोह गर्दै ६ महिनाको तयारीमा २० जना सांसद लिएर जान सफल भएको लामिछानेको भनाइ छ ।
थाहा खबरबाट
