संवाददाता ।
लामो समयदेखि खाली रहेको संसदको उपसभामुख पद अन्ततः सत्तारुढ दल कांग्रेसको पोल्टामा परेको छ । कांग्रेसकी सांसद पुष्पा भुसाल एमालेकी विद्या भट्टराईलाई पराजित गर्दै उपसभामुख निर्वाचित हुनुभएको छ ।
आज भएको निर्वाचनमा खसेको २४२ मध्ये १४८ मत ल्याउँदै भुसाल विजयी हुनुभएको हो । भुसाललाई माओवादी केन्द्र, नेकपा एकीकृत समाजवादी, जसपा, राष्ट्रिय जनमोर्चा र लोसपाले समेत समर्थन गरेका थिए ।
पराजित एमालेकी भट्टराईले ९३ मत ल्याउनुभएको छ । उहाँलाई एमालेबाहेक राप्रपाले समर्थन गरेको थियो । तत्कालीन उपसभामुख डाक्टर शिवमाया तुम्बाहाम्फेले २०७६ साल माघ ६ गते राजीनामा दिएपछि प्रतिनिधिसभामा नयाँ उपसभामुखको निर्वाचन हुन सकेको थिएन ।
संसदको कार्यकाल नै सकिन लाग्दा भुसाल उपसभामुख निर्वाचित हुनुभएको हो । कानून अध्ययन गर्नुभएका भुसाल वरिष्ठ अधिवक्तासमेत हुनुहुन्छ । उपसभामुख संवैधानिक परिषदको सदस्यसमेत रहने व्यवस्था छ ।
अब संवैधानिक परिषदमा प्रधानमन्त्री शेरबहादुर देउवा, सभामुख अग्निप्रसाद सापकोटा र उपसभामुख पुष्पा भुसाल तीनजना रहनुहुनेछ । अर्कोतर्फ प्रमुख विपक्षी दलका नेता केपी शर्मा ओली र राष्ट्रियसभाका अध्यक्ष गणेश तिमल्सिना हुनुहुन्छ ।
कामु प्रधानन्यायाधीश दीपक कार्की असोजसम्म रहनुहुनेछ । त्यसबीचमा महाअभियोगको टुंगो नलागेमा हरिकृष्ण कार्की कामु रहनुहुनेछ ।
नेपाल प्रेसबाट