एजेन्सी । न्यूजिल्याण्डमा एक जना नागरिकमा कोरोना संक्रमण देखिएपछि राष्ट्रव्यापी लकडाउनको घोषणा गरेको छ ।
न्यूजिल्याण्डले कोरोना संक्रमित भेटिएको अकल्याण्ड सहरमा एक साताको लागि लकडाउनको घोषणा गरेको हो भने मुलुकको अन्य स्थानमा तीन दिनमा लकडाउन हट्नेछ ।
न्यूजिल्याण्डका अधिकारीहरूले अहिले भेटिएको कोरोना संक्रमण डेल्टा भेरियन्टको हो कि भनेर सुरक्षा सतर्कता बढाइएको बताएका छन् । अहिले न्यूजिल्याण्डका करिब २० प्रतिशत नागरिकले कोरोना भाइरसविरुद्धको खोप लगाएका छन् ।
न्यूजिल्याण्डमा भेटिएका संक्रमितले भ्रमण गरेको कोरोनामान्डेल सहरमा पनि एक साताको लकडाउन गरिएको छ । प्रधानमन्त्री ज्यासिन्डा अर्डनले लकडाउन अवधिमा अत्यावश्यकबाहेकका सबै सेवा बन्द हुने बताउनुभएको छ ।
न्यूजिल्याण्ड कोरोना संक्रमणलाई नियन्त्रणमा सफल भएको मुलुक हो । यहाँ पछिल्लो ६ महिनायता एक जनामा पनि कोरोना भाइरसको संक्रमण देखिएको थिएन ।
