संवाददाता ।
नेपाल ट्रेड युनियन महासंघ (जिफन्ट) ले सामाजिक सुरक्षासम्बन्धी सर्वोच्च अदालतले गरेको आदेशलाई सच्याउन माग गरेको छ । यो आदेश नसच्याइए सामाजिक सुरक्षा प्रणालीमा संकट आउन सक्ने महासंघले भनाइ छ ।
महासंघले अन्तरिम आदेश पूर्ण फैसलाबाट सच्चिने विश्वास व्यक्त गर्दै सर्वोच्च अदालतले दिएको अन्तरिम आदेश नसच्चिए श्रम बजारमा अराजकताको अवस्था सिर्जना हुन सक्ने उल्लेख छ ।
महासंघका महासचिव जनक चौधरीले विज्ञप्ति जारी गर्दै साउन १९ गते सर्वोच्च अदालतले दिएको अन्तरिम आदेशले अन्योल सिर्जना गरेको बताउनुभयो ।
सामाजिक सुरक्षा कोष विरुद्ध पछिल्लो समयमा योजनाबद्ध षड्यन्त्र सुरु भएको जिफन्टको दाबी छ ।
गत मंगलबार सर्वोच्च अदालतले बैंक तथा वित्तीय क्षेत्रका कर्मचारीलाई सामाजिक सुरक्षा कोषमा जान बाध्यकारी नहुने फैसला गरेको थियो । सामाजिक सुरक्षा कोषमा जानका लागि बाध्य नबनाउन सर्वोच्च अदालतले मंगलबार अन्तिम आदेश दिएको थियो ।
