संवाददाता ।
नेपाली राष्ट्रिय फुटबल टोलीका मुख्य प्रशिक्षक अब्बदुल्लाह अल्मुताइरी सामाजिक सञ्जालमा निकै सक्रिय रहनुहुन्छ । विशेषगरी फेसबुकमा र इन्सटाग्राममा उहाँ नेपाली फुटबल समर्थकहरूसँग भलाकुसारी गर्नुहुन्छ ।
गत अप्रिलमा मुख्य प्रशिक्षकमा नियुक्त भएदेखि नै अल्मुताइरी सामाजिक सञ्जालमा सक्रिय देखिनुभएको छ । प्रायः जसो नेपाली टिमलाई बलियो समर्थन गरौँ भन्ने खालका स्टाटस अल्मुताइरीले लेख्दै आउनुभएको छ । यसबाट नेपाली समर्थकहरू उत्साहित देखिन्थे ।
कमसेकम अल्मुताइरीको स्टाटस मुनि आउने प्रतिक्रियाहरूले यही देखाउने गरेको छ । तर आज भने अल्मुताइरीको फेसबुक अकाउन्टमा फरक किसिमको स्टाटस आयो । जसमा लेखिएको थियो, ‘म एन्फा समक्ष राजीनामा बुझाउँदैछु ।’
राजीनामा दिनुको मुख्य कारण, एन्फाका उपाध्यक्ष पंकज नेम्बाङ भएको उहाँले दाबी गर्नुभएको छ । उहाँले नेम्बाङलाई आरोप पनि लगाउनुभएको छ, बारम्बार समस्या खडा गरेको भनेर ।
अल्मुताइरीको यस्तो स्टाटस आएपछि सामाजिक सञ्जालमा अल्मुताइरीको समर्थन र नेम्बाङको विरोधमा प्रतिक्रिया आइरहेका छन् । यसको मुख्य कारण, अल्मुताइरीले सामाजिक सञ्जालमा समर्थकमाझ स्थापना गरेको सम्बन्ध नै हो । अल्मुताइरीलाई मन पराउने समर्थकहरूले सामाजिक सञ्जालमा नेम्बाङको चर्को आलोचना गरिरहेको देखिएको छ ।
के भन्छन् नेम्बाङ ?
उहाँले पत्रकारहरूसँग भन्नुभयो, ‘ममाथि षड्यन्त्र भयो ।’ उहाँले एन्फाले छानबिन गर्नुपर्ने पनि बताउनुभएको छ । ‘एन्फाले यस विषयमा छानबिन गर्नुपर्छ । म दोषी देखिए राजीनामा दिन तयार छु ।
छानबिनबाट म दोषी भए म कारबाहीको भागिदार बन्नुपर्छ । अरु दोषी देखिए त्यही अनुसारको कदम चालिनुपर्छ । तर छानबिन चाँहि हुनुपर्छ र अहिले देखिएको समस्याको समाधान हुनुपर्छ ।’
उता एन्फाका प्रवक्ता किरण राईले आफूहरूकोमा औपचारिक रुपमा राजीनामाको जानकारी आइ नसकेको प्रतिक्रिया दिनुभएको छ ।
मुख्य प्रशिक्षक अल्मुताइरीले सामाजिक सञ्जालमा राखेको स्टाटस देखेको तर औपचारिक रुपमा वा लिखित रुपमा केही नबुझाएको प्रवक्ता राईको भनाइ छ । अल्मुताइरी कतारी फुटबल संघको आर्थिक सहयोगमा नेपालका मुख्य प्रशिक्षकमा नियुक्त हुनुभएको हो ।
एएफसी प्रो–लाइसेन्स भएका अल्मुताइरीलाई एक वर्षका लागि जिम्मेवारी दिइएको हो । गत महिना कुवेतमा नेपालले उहाँकै प्रशिक्षणमा विश्वकप तथा एसियन कपको छनौटमा भाग लिएको थियो । आसन्न साफ च्याम्पियनसिपको तयारीका लागि पनि उहाँले अभ्यास गराइरहनुभएको छ ।
इकागजबाट
