सविता चन्द
बाँके । बाँके प्रहरीले दुई महिनामा एक करोड रुपैयाँभन्दा बढी राजस्व संकलन गरेको छ। बाँके प्रहरी प्रमुख प्रहरी उपरीक्षक ओमबहादुर रानाको दुई महिने कार्यकालको प्रगति प्रतिवेदन सार्वजनिक गरेको हो।
भारतबाट हुने अवैध सामान ओसारपसार नियन्त्रणमा कडाइ गरेको प्रहरीले तस्करी नियन्त्रणबाट ७१ लाख ९० हजार ७३३ रुपैयाँ राजस्व संकलन गरेको हो।
यस्तै, ट्राफिक कारवाही तथा जरिवानाबाट २१ लाख ८९ हजार रुपैयाँ राजस्व संकलन भएको जनाएको छ। अदालतको फैसलापछि र मुद्दा दायर हुनुभन्दा पहिले नै फरार भएका अभियुक्तबाट एक लाख आठ हजार ५३८ रुपैयाँ असुल भएको बाँके प्रहरी प्रवक्ता प्रहरी नायब उपरीक्षक सुवास खड्काले जानकारी दिनुभयो।
उहाँले जुवा तास खेलिरहेकालाई नियन्त्रणमा लिई उनीहरुको साथबाट बरामद भएको रकमसहित गरी तीन लाख ४९ हजार ४५० रुपैयाँ राजस्व संकलन भएको बताउनुभयो। प्रहरीले मास्क प्रयोग नगर्नेलाई नियन्त्रणमा लिएर जरिवाना गर्दै आएको छ। जसबाट दुई लाख एक हजार ३०० रुपैयाँ राजस्व संकलन भएको छ।
प्राकृतिक स्रोत दोहन गर्नेहरुबाट एक लाख ९५ हजार रुपैयाँ राजस्व संकलन भएको छ। यी सबैबाट एक करोड दुई लाख ३४ हजार २१ रुपैयाँ राजस्व संकलन भएको प्रहरीले जनाएको छ। दुई महिनाको अवधिमा भन्सार चोरी निकासी पैठारी गर्ने ५७ जना मानिससँगै २८ वटा मोटरसाइकल, दुई वटा बोलेरो भ्यान, दुई वटो रिक्सा पनि बरामद गरेको छ।
त्यसैगरी चोरी निकासी भइरहेको २८ बोरा अवैध सुर्ती बरामद भएको छ।
ठूलो परिमाणमा लागुऔषध बरामद
लागु औषध नियन्त्रणमा पनि बाँके प्रहरी खरो रुपमा उत्रिएको छ।
दुई महिनामा समढे १८ किलो अफिम प्रकरणमा फरार रहेका अभियुक्तलाई पक्राउ गरेको बाँके प्रहरी प्रवक्ता प्रहरी नायव उपरीक्षक खड्काले बताउनुभयो। उहाँले दुई महिनाको अवधिमा चार किलो १७४ ग्राम लागूऔषध अफिमसहित एक जनालाई पक्राउ गरिएको बताउनुभयो ।
त्यसैगरी, २९ ग्राम ब्राउनसुगरसहित पाँच जनालाई पक्राउ गर्न बाँके प्रहरी सफल भएको छ। भने, ४८७ सिसी कोरेक्स सहित ६ जना पक्राउ परेको छन्।
घरेलु हातहतियार सहित एक जना महिला पक्राउ परेको बताउँदै ४३ करोड २ लाख ५३ हजार ९५ रुपैँया ठगी मुद्धामा फरार मुख्य प्रतिवादीलाई समेत पक्राउ गरि कानूनी दायरामा ल्याएको दावी गर्नुभयो।
पाटे बाघको छाला र १० किलो ५ सय ग्राम हड्ही सहित एक जनालाई पक्राउ गरि अनुसन्धान भइरहेको प्रहरीले जनाएको छ।
९८ जना फरार अपराधी पक्राउ
अदालतबाट कैद र जरिवाना फैसला भई फरार रहेका अपराधीलाई पक्राउ गर्न बाँके प्रहरीले अग्रसरता देखाएको छ।
दुई महिनामा बाँके प्रहरीले कैद र जरिवाना भुक्तान नगरी फरार रहेका ९८ जनालाई पक्राउ गरी अदालतमा बुझाएको छ। पक्राउ परेका ब्यक्तिबाट एक लाख ८ हजार ५३८ रुपैयाँ राजस्व संकलन भएको डिएसपी खड्काले बताउनुभयो ।
बाँके प्रहरीले दुई महिनामा ३३ वर्ष २ महिना कैद सजाय भुक्तान गराउन सफल भएको छ। त्यसैगरि प्राकृतिक श्रोतको दोहन गरिरहेका २४ वटा क्रसर उद्योग बन्द गराएको छ।
उक्त क्रसर उद्योगको ५ करोडको अबैध गिट्टि, ढुंगा सिज गराएको प्रहरीले दुई वटा एक्जाभेटर, २३ वटा ट्याक्टर नियन्त्रणमा लिएर एक लाख ९५ हजार रुपैँया राजस्व संकलन गरेको छ। थाहाखबर
