एजेन्सी । तालिवानी लडाकूहरुले अफगानिस्तान सरकार र पश्चिमा राष्ट्रहरुले गत वर्ष गरेको सम्झौताको पालना नगरेको आरोप लगाएको छ ।
तालिवानको राजनीतिक कार्यालयका एक अधिकारीले अन्तर अफगान वार्ता सुरु भएको तीन महिनाभित्र तालिवानी कैदीहरुलाई रिहा गर्नुपर्ने सहमति पालना नभएको जनाएका हुन् ।
तर अफगान सरकारले शान्ति वार्ता सुरु गरेको तीन महिना बितिसक्दा पनि आफ्ना कैदीबन्दी रिहा नगरेको भन्दै तालिवानीले आपत्ति जनाएको हो ।
पूर्व निर्धारित समयभन्दा केही ढिलो वार्ता सुरु भएको र सोही समयमा अमेरिकी नेतृत्व परिवर्तन भएपनि अफगानिस्तानका सशस्त्र समूहले सरकारसँग वार्ता सुरु गरेका थिए ।
तर सरकारी पक्षले वार्ताअघि भएको सहमति पालनामा इमान्दारिता नदेखाएको भन्दै तालिवानीले वार्ताप्रति नै आशंका व्यक्त गरेको हो ।
तालिवानी लडाकूहरुले अफगानिस्तानमा रहेका बाँकी अमेरिकी सेना फिर्ता पठाउन भएको ढिलाइप्रति पनि चिन्ता व्यक्त गरेको अलजजिराले जनाएको छ ।
अमेरिकाका नवनिर्वाचित राष्ट्रपति जो वाइडेनले अफगानिस्तानसँग भएको सम्झौताको समीक्षा गर्ने बताइएपनि पूर्वसर्तहरु पालना नभएकाले आशंका पैदा भएको तालिवानी लडाकूका उच्च अधिकारीहरुले जनाएका छन् ।
