नेपालगन्ज । स्वास्थ्य तथा जनसंख्या मन्त्रालयले कोरोनाको संक्रमण बढेसँगै पीसीआर परीक्षण गराउनका लागि नमुना दिएर आउने सर्वसाधारणलाई सचेत हुन आग्रह गरेको छ ।
मन्त्रालयले मंगलबार सूचना जारी गर्दै परीक्षणका नमुना दिन जाँदा अन्यलाई संक्रमण गराउन सकिने तथा नमुना दिएर फर्कँदा बाटोमा जहिले सुकै जोकोहीबाट संक्रमण हुन सक्ने भएकाले सावधानी अपनाउन अनुरोध गरेको हो । संक्रमणको शंकामा नमुना दिएर फर्की आइसकेपछि जनस्वास्थ्यका न्युनतम मापदण्ड पालना नगरी भिडभाडमा निस्कने गरेको र रिपोर्ट लिन आफै जाने गरेको पाइएको मन्त्रालयले जनाएको छ ।
मन्त्रालयले परीक्षण नतिजा मोबाइल फोन वा एसएमएसमार्फत आउने भएकाले मोबाइल नम्बर सही उपलब्ध गराउन अनुरोध गरेको छ । मन्त्रालयका सहप्रवक्ता समिरकुमार अधिकारीले नेगेटिभ रिपोर्ट आए मोबाइलमै एसएमस र पोजिटिभ आए इपिडिमियोलोजी तथा रोग नियन्त्रण महाशाखाले जानकारी गराउने भएकाले शंकास्पद व्यक्तिहरु अस्पताल तथा प्रयोगशालामा रिपोर्ट लिन नजान आग्रह गर्नुभएको छ ।
