सबिता चन्द
नेपालगन्ज । बाँके क्षेत्र नम्बर २ का विभिन्न मतदान केन्द्रहरूमा बिहान ९:४५ बजेसम्म करिब ३० प्रतिशत मत खसेको छ। प्रारम्भिक जानकारीअनुसार मतदान शान्तिपूर्ण र सौहार्दपूर्ण वातावरणमा भइरहेको छ।
मतदान केन्द्रहरूमा बिहानैदेखि मतदाताको उल्लेखनीय उपस्थिति देखिएको छ। युवादेखि ज्येष्ठ नागरिकसम्म उत्साहका साथ मतदान केन्द्रमा पुगेर आफ्नो मताधिकार प्रयोग गरिरहेका छन्। कतिपय स्थानमा बिहानैदेखि मतदाताको लामसमेत देखिएको स्थानीय स्रोतले जनाएको छ।
निर्वाचनलाई व्यवस्थित र सुरक्षित बनाउन सुरक्षा निकाय तथा निर्वाचनकर्मीहरू सक्रिय रूपमा खटिएका छन्। हालसम्म कुनै अप्रिय घटना नभएको र मतदान प्रक्रिया सहज रूपमा अगाडि बढिरहेको बताइएको छ।
स्थानीय मतदाताहरूले आफ्नो प्रतिनिधि छान्ने अवसरलाई उत्सवका रूपमा लिँदै उत्साहपूर्वक मतदान गरिरहेका छन्। यदि यही उत्साह कायम रहेमा बाँके क्षेत्र नम्बर २ मा यसपटक उल्लेखनीय मतदान हुने अपेक्षा गरिएको छ।
