सबिता चन्द
नेपालगन्ज । चुनावी माहोल उत्कर्षमा पुगेका बेला बाँके क्षेत्र नं. २ का प्रतिनिधि सभा सदस्य पदका उम्मेदवार दिपेन्द्र बिष्टले भावुक अपिल गर्दै मतदातासँग विश्वास कायम राख्न आग्रह गर्नुभएको छ। “मत परिवर्तन नगर्नु होला, म तपाइँहरूको साथमै छु। परिवर्तनको एजेन्डा मेरै हो,” उहाँले नेपालगन्ज–१० सोफिया टोलमा आयोजित भेटघाट कार्यक्रममा भन्नुभयो।
सोफिया टोलमा तीन सयभन्दा बढी मतदातासँग प्रत्यक्ष संवाद गर्दै बिष्टले आफ्नो विकास दृष्टिकोण, सुशासनको प्रतिबद्धता र स्थानीय प्राथमिकताबारे धारणा राख्नुभयो। कार्यक्रममा नेपाली कम्युनिस्ट पार्टीका लुम्बिनी प्रदेश सचिवालय सदस्य डिल्ली बराल (अमिर) सहितका नेता–कार्यकर्ताको उपस्थिति थियो। संयुक्त उपस्थितिले अभियानलाई थप ऊर्जा दिएको सहभागीहरू बताउँछन्।
वडा नं. १० का तीन सयभन्दा बढी सर्वसाधारणले साथ व्यक्त गरेपछि बिष्ट उत्साहित देखिनुभयो। समर्थकहरूका अनुसार, प्रत्यक्ष भेटघाट र खुला संवादले मतदातामा विश्वास बढाएको छ। स्थानीयले रोजगारी, पूर्वाधार, शिक्षा र स्वास्थ्य सेवाजस्ता विषयमा आफ्ना अपेक्षा राखेका थिए।
नेपालगन्ज–१० को कार्यक्रम लगत्तै बिष्ट डुडुवा–६ सुब्बाकुरुवातर्फ घरदैलो अभियानमा निस्किनुभयो। त्यहाँ पनि टोल–टोलमा पुगेर उहाँले मतदातासँग भलाकुसारी गर्नुभयो। स्थानीय सहभागिता र सकारात्मक प्रतिक्रिया देखेपछि बिष्ट झनै प्रफुल्लित हुनुभएको टोलीका सदस्यहरूले बताएका छन्।
चुनाव नजिकिँदै जाँदा यसरी लगातार जनसम्पर्कमा सक्रिय रहनु र ठूलो संख्यामा मतदातासँग संवाद गर्नु चुनावी रणनीतिको महत्वपूर्ण पक्ष मानिन्छ। बढ्दो साथ र उत्साहले बाँके–२ को प्रतिस्पर्धालाई थप रोचक बनाएको छ।
अब बाँकी छ—यो भावनात्मक अपिल र प्रत्यक्ष संवाद मतपेटिकामा कत्तिको रूपान्तरण हुन्छ भन्ने प्रश्न। त्यसको उत्तर भने मतदान परिणामले नै दिनेछ।
