सबिता चन्द
नेपालगन्ज । बाँके क्षेत्र नं. २ का प्रतिनिधि सभा सदस्य पदका उम्मेदवार दिपेन्द्र बिष्टले आइतबार शिवरात्री पर्वको अवसरमा बागेश्वरी मन्दिर पुगेर भगवान शिवको पूजा–आराधना गर्नुभएको छ । धार्मिक आस्थाको केन्द्रमा पुगेर उहाँले शान्ति, सद्भाव र समृद्धिको कामना गर्दै दीप प्रज्वलन र विधिपूर्वक पूजा सम्पन्न गर्नुभयो ।
पूजापछि बिष्टले मन्दिरका मूल पुजारी गुरु चन्दनाथ सँग टीका ग्रहण गर्दै आशिर्वाद लिनुभयो। सो अवसरमा उहाँले मन्दिरका पुजारीहरूसँग आत्मीय भेटघाट र भलाकुसारी गर्नुभयो। धार्मिक परम्परा, सांस्कृतिक पहिचान र समुदायबीचको सद्भावबारे छलफल गर्दै बिष्टले धार्मिक स्थलहरूको संरक्षण र व्यवस्थापनमा सबैको साझा जिम्मेवारी रहेको धारणा व्यक्त गर्नुभयो।
शिवरात्रीजस्तो पावन पर्वमा मन्दिर पुगेर पूजा गर्नुले उम्मेदवार बिष्टको आस्था मात्र होइन, संस्कार र संस्कृति प्रतिको सम्मानलाई पनि उजागर गरेको स्थानीयले बताएका छन्। धार्मिक केन्द्रमा जनताको भावनासँग जोडिएर गरिएको यस भेटघाटले सामाजिक समन्वय र विश्वासको सन्देश दिएको उनीहरूको भनाइ छ।
स्थानीय स्तरमा संस्कृति, आस्था र विकासलाई सँगसँगै अघि बढाउने प्रतिबद्धता जनाउँदै बिष्टले यस्ता पर्वहरूले समाजलाई एकतामा बाँध्ने काम गर्ने उल्लेख गर्नुभयो।शिवरात्रीको दिन बागेश्वरीमा देखिएको यो दृश्यले आस्था र सार्वजनिक जीवनबीचको सन्तुलनलाई स्मरण गराउँदै चुनावी माहोलमा सकारात्मक ऊर्जा थपेको छ।
