सबिता चन्द ठकुरी
नेपालगन्ज । बाँके क्षेत्र नं. २ का प्रतिनिधि सभा सदस्य पदका युवा उम्मेदवार दिपेन्द्र बिष्टले आज जेन–जी युवाहरूसँग बसेर खुला छलफल गर्नुभएको छ। बदलिँदो समय, प्रविधि र अवसरको खोजीमा रहेका जेन–जीका आवाजलाई नजिकबाट सुन्दै बिष्टले उनीहरूले उठाएका मागप्रति आफू गम्भीर रहेको स्पष्ट पार्नुभयो।
छलफलमा जेन–जी युवाहरूले रोजगारी, सीप विकास, डिजिटल अवसर, शिक्षा प्रणाली, उद्यमशीलता र पारदर्शी शासन जस्ता विषयमा आफ्ना धारणा राखेका थिए। युवाहरूले “हामीलाई भाषण होइन, अवसर चाहिएको छ” भन्दै व्यवहारिक समाधानको अपेक्षा व्यक्त गरे।
युवाको कुरा ध्यानपूर्वक सुन्दै उम्मेदवार बिष्टले भन्नुभयो, “जेन–जी केवल भोलिको भविष्य होइन, आजकै शक्ति हो। तपाईंहरूले उठाएका हरेक मुद्दा मेरो एजेन्डाको केन्द्रमा छन्।” उहाँले युवालाई नीति निर्माण र निर्णय प्रक्रियामा सहभागी गराउने प्रतिबद्धता पनि जनाउनुभयो।
बिष्टले डिजिटल सीप, स्टार्टअप प्रवर्द्धन, प्रविधिमैत्री शासन र रोजगारी सिर्जनालाई प्राथमिकतामा राख्ने बताउँदै जेन–जीको सोच र ऊर्जालाई राज्यको योजनासँग जोड्ने धारणा राख्नुभयो।
छलफलमा सहभागी जेन–जी युवाहरूले बिष्टलाई आफ्नो पुस्ताको भावना बुझ्ने र संवाद गर्न सक्ने नेताको रूपमा लिएको प्रतिक्रिया दिएका छन्। उनीहरूका अनुसार खुलेर कुरा सुन्ने र जवाफ दिने शैलीले भरोसा बढाएको छ।
युवासँग प्रत्यक्ष संवादमार्फत बिष्टले बाँके–२ मा नयाँ राजनीतिक बहसको सुरुवात गरेको भन्दै यो छलफललाई आशा र सहभागिताको संकेतका रूपमा हेरिएको छ।
