नेपालगन्ज । नेकपा माओवादि केन्द्रका महासचिव देवप्रसाद गुरूङले व्यवस्था उल्टाउने कुरा सम्भव नभएकाे बताउनु भएको छ । नेपालमा लोकतन्त्रको विकल्प नरहेकाे उल्लेख गर्दै गुरुङले केही तत्वले देशमा अशान्ति फैलाउन खोजे पनि उनिहरूकाे चाहना कहिले पूरा नहुने दावी गर्नु भएको छ ।
बिहिबार बाँकेका संचारकर्मिहरूसँगकाे भेटमा बाेल्दै महासचिव गुरूङले पछिल्लाे समय जातीय, धार्मिक र साम्प्रदायिक हिंसा भड्काउन खोजिएको भन्दै जनता सचेत हुनुपर्ने धारणा राख्नु भएको हो ।
महासचिव गुरुङले नेपालमा एउटै कम्युनिष्ट केन्द्र बनाउने अभियानमा आफूहरू रहेको बताउनु भयो । उहाँले पहिलाे चरणमा पूर्व माओवादीहरूको एकता र त्यस पछि कम्युनिष्ट नाम भएका सबैको एउटै केन्द्र बनाउने अभियानमा आफूहरू रहेको बताउनु भयो । उहाँले एउटै झण्डा भएकाहरू एक ठाँउमा आउनुपर्ने भन्दै आउन नसक्नेहरूको मोर्चा बनाएर आगाडि बढिने समेत बताउनु भएको छ ।
पहिलो चरणमा बाबुराम भट्टराई, नेत्र बिक्रम चन्द (बिप्लव) लगायतसँग पार्टी एकताको कुरा भईरहेको उल्लेख गर्दै गुरूङले एकता प्रक्रिया छिट्टै टुंगोमा पुग्ने विश्वास ब्यक्त गर्नु भएको छ।माओवादी पार्टी एक आन्दोलन भएको भन्दै उहाँले कहिले खुम्चने त कहिले फुक्ने गरेको बताउँदै माओवादी आन्दोलनको विकल्प नभएको धारणा राख्नु भएको हो ।
प्रचण्ड नेतृत्वको सरकारले सुशासनकालागि केही उदाहरणीय काम गरेको बताउँदै गुरूङले मुलुककाे स्थित नर्मल काेर्षमा अगाडि बढिरहेकाे दावि गर्नु भयो। उहाँले ‘टीआरसी’ लगायत शान्ति प्रक्रियासँग जाेडिएका अन्य विधेयकमा राष्ट्रिय सहमतिकाे प्रयास भईरहेकाे उल्लेख गर्दै सँसदकाे हिउदे अधिवेशनसम्म सहमती जुट्नेमा आशावादी रहेकाे बताउनु भयो ।
नेकपा (माओवादी केन्द्र) को विशेष अभियानका क्रममा कोहलपुर आएका गुरुङले बिहिबार बैजनाथ तथा कोहलपुर नगरपालिकाका अगुवा कार्यकर्तासँग अन्तरक्रिया गरेकाे नेकपा माओवादि केन्द्र बाँकेका संयाेजक नरेन्द्र पाण्डे (जेम्स) ले जानकारी दिनु भयो । पाण्डेका अनुसार महासचिव गुरूङकाे शुक्रबार सल्यान हुँदै जाजरकोट र रुकुममा पुगेर भुकम्प प्रभावितहरूसँग अन्तरक्रिया गर्ने कार्यक्रम रहेकाे छ ।
