नेपालगन्ज । जाजरकोटलाई केन्द्रविन्दू बनाएर गत राति गएको भूकम्पमा परी घाइते भएकाहरुलाई उपचारको ब्यवस्था मिलाउन भेरी अस्पतालले आवश्यक तयारी गरेको छ ।
बाँकेका प्रमुख जिल्ला अधिकारी श्रवणकुमार पोखरेल, भेरी अस्पताल विकास समितिका अध्यक्ष बीरेन्द्र शाह, अस्पतालका मेडिकल सुपरिटेन्डेण्ट डा. पवनजंग रायमाझी, चिकित्सक, स्वास्थ्यकर्मी, नर्स सहितको टोलीले बिहान जाजरकोट र रुकुम पश्चिमबाट उपचारका लागि आउने बिरामीको व्यवस्थापन गरेको हो ।
समितिका अध्यक्ष शाहले अस्पतालको नयाँ भवनको भुँईतलामा भुकम्पबाट घाइते बिरामीलाई उपचार गर्न आवश्यकता अनुसार बेड तयारी अवस्थामा राखिएको बताउनुभयो । जाजरकोट र रुकुम पश्चिममा अहिलेसम्म ९२ जनाले ज्यान गुमाएका छन् ।
कर्णाली प्रदेश प्रहरी कार्यालयका प्रमुख डिआइजी भिम ढकालले थप शव फेला परेको जानकारी दिदै शनिबार बिहान ७ बजेसम्म ७३ जनाको मृत्यु भएको र १ सय ८ जना घाइते भएको बताउनुभयो ।
‘अहिलेसम्म ९२ जनाको मृत्यु हुनुका साथै १ सय १० जना घाइते भएको जानकारी आएको छ,’ ढकालले भन्नुभयो ‘उद्दारका लागि प्रहरी खटिरहेको छ, मृतक र घाइतेको संख्या बढ्न सक्छ ।’ जाजरकोटलाई केन्द्रबिन्दु पारेर शुक्रबार मध्यराती भूकम्प गएको थियोे । भूकम्प नेपालगन्ज लगायत देशैभरका विभिन्न जिल्लामा महसुस भएको थियो । राती ११ बजेर ४७ मिनेट जाँदा जाजरकोटको रामिडाँडा केन्द्रबिन्दु भएर ६.४ रेक्टर स्केलको भूकम्प गएको खानी तथा भूगर्भ विभाग राष्ट्रिय भूकम्प मापन केन्द्रले जनाएको छ ।