संवाददाता, राप्तीसोनारी, बाँके ।
सर्प दशं उपचार केन्द्र ओभरी बाँकेमा २०८० बैशाख महिना देखी २७ जेठ सम्म २ जनाले उपचार सेवा लिएका छन । यस्तै गत बर्ष २०७९ सालमा भने ३५ जनाले सेवा लिएका थिए । जसमध्ये एक जनालाई मात्र जटिल खालको स्वास्थ्य समस्या देखिएको थियो ।
सर्पले टोकेका जटिल खालका विरामीहरुको भेरी अस्पताल नेपालगंजमा उपचार गरिन्छ । गर्मी र धेरै पानी परिरहे सर्पको जोखिम हुन्छ । खासगरी तराईका जिल्लाहरुमा विषालु सर्पको टोकाईबाट समयमा उपचारको अभावमा ज्यान गुमाउनुपर्ने वाध्यता छ ।
त्यसकारण सर्पले टोकीहाले जति सक्यो छिटो अस्पताल पुग्नु पर्छ । झारफुक वा अन्य कुनै पनि तरिकाले उपचार गर्नु भनेको ज्यान खतरामा पार्नु हो । आफनो घर, आँगन सफा राख्ने, सानो ठुलो प्वाल, खाल्डीखुल्डी भए, बन्द गर्ने र मुसा भए नियन्त्रण गर्ने ।
सुत्ने बेला होस अथवा दैनिक कामकाज गर्दा राम्ररी ख्याल गर्ने, नियमित झूल लगाएर मात्रै सुत्ने, कुखुरा, भ्यागुता, मैना चरा फरक आवाजले कराउँदा सचेत रहने, किन की त्यहाँ सर्प हुन सक्छ । सर्प देखेमा त्यसलाई नचलाउने, होहल्ला नगर्ने । संम्भव भएसम्म सर्प उद्दार टोलीलाई खबर गर्ने गर्नुपर्छ ।