संवाददाता, नेपालगंज ।
प्लान इन्टरनेशनल नेपालको सहयोगमा बाँके युनेस्को क्लबद्धारा सिलाई तालिम र सामाग्री समेत लिएर व्यवसाय शुरु गरेका बर्दियाका १८ देखि २४ वर्ष उमेर समूहका युवा महिलाहरु आर्थिक रुपमा सक्षम बन्दै गएका छन् ।
केही समयअघिसम्म बेरोजगार भई खाना लगाउन समेत समस्या भईरहेको बताउने ती युवा महिलाले अहिले न्युनतम १२ हजार रुपैयाँ देखि १५ हजार रुपैयाँ सम्म मासिक आम्दानी गरेर घर खर्च चलाईरहेको बताउँछन ।
सिलाई तालिम पाएपछि पसल सञ्चालनका लागि सामाग्री समेत पाएका बर्दियाको ठाकुरबाबा नगरपालिका–२ भुरीगाउँका ६ जना युवा महिलाले सामुहिक रुपमा सञ्चालनमा ल्याएको न्यु सामुहिक टेलर स्थानीय बीच अहिले निकै लोकप्रिय बन्दै गएको छ । महिलालहरुले सिलाई तालिम पूरा गरेपछि स्टार्टअप सपोर्ट प्रत्येकलाई ६६ हजार ३ सय ३५ रुपैयाँ प्रदान गरिएको थियो ।
