काठमाडौं । सभामुख अग्नि सापकोटाले संवादमा आउन आह्वान गरे पनि प्रमुख प्रतिपक्षी दल नेकपा एमालेले आइतबार पनि प्रतिनिधि सभाको बैठक चल्न दिएनन् ।
तीन दिनदेखि लगातार संसद अवरोध गर्दै आएको एमालेका सांसदले आइतबार पनि सभा अवरुद्ध गर्दै नाराबाजी गरेका हुन् । नाराबाजीकै बीचमा सभामुख सापकोटाले एमाले सांसदलाई संबोधन गर्दै वार्ता र संवादबाट समस्याको समाधान खोज्न आग्रह गर्नुभयो ।
सापकोटाले भन्नुभयो, ‘विपक्षी दलका सांसदलाई संवादतर्फ अग्रसर हुनका लागि अनुरोध गर्दछु । हामी सबैले गम्भीर ढंगले मनन गरेर संसद सहज ढंगले सञ्चालन हुने वातावरण बनाउन म आह्वान गर्छु, अपिल गर्छु ।’
१४ सांसदको कारबाहीसम्बन्धी विषय सर्वोच्च अदालतमा विचाराधीन रहेकाले त्यस विषयमा संसदमा छलफल हुन नसक्ने भन्दै उहाँले मर्यादित रुपमा सदन सञ्चालनमा सहयोग गर्न एमाले सांसहरुलार्य आह्वान गर्नुभयो ।
सभामुख सापकोटाको आग्रहलाई बेवास्ता गर्दै एमाले सांसदहरुले भने संसदीय मर्यादा कायम गर, पदीय मर्यादा कायम गर, संवैधानिक सर्वोच्चता कायम गर, यथास्थितिमा संसद चल्न सक्दैन भन्ने नारा लगाउँदै सदनको कार्वाही अवरुद्ध पारेका हुन् ।
रोष्टम घेरेर नाराबाजी गरेका कारण बैठक सुचालु गर्न अवरोध पुगेपछि सभामुख सापकोटाले १५ मिनेटका लागि बैठक स्थगित गर्नुभएको छ । आजको बैठकमा एमाले संसदीय दलका नेता केपी ओली स्वयं पनि नाराबाजीमा सहभागी हुनुभयो । ईमेजखबर
