सबिता चन्द
नेपालगन्ज । निर्वाचन नजिकिँदै जाँदा बाँके क्षेत्र नं. २ को चुनावी परिदृश्यमा एकाएक नयाँ हलचल देखिएको छ। प्रतिनिधि सभा सदस्य पदका उम्मेदवार दिपेन्द्र बिष्टको पक्षमा माहोल ह्वात्तै बढेको भन्दै समर्थकहरू उत्साहित देखिन्छन्।
पछिल्ला केही दिनयता घरदैलो अभियान, टोलसभा र भेटघाट कार्यक्रमहरूमा उल्लेख्य सहभागिता देखिएको छ। नेपालगन्जका विभिन्न वडामा बिष्टलाई भेट्न स्थानीयहरू स्वस्फूर्त रूपमा निस्किएको दृश्यले चुनावी तापक्रम बढाएको छ। कतै युवाहरू प्रचारमा सक्रिय छन्, कतै महिला समूहले समर्थन जनाइरहेका छन्, भने कतै ज्येष्ठ नागरिकले अनुभव र अपेक्षा साटिरहेका छन्।
बिष्टले आफ्ना एजेन्डामा विकास, पारदर्शिता र जनसरोकारका विषयलाई केन्द्रमा राख्दै मतदातासँग प्रत्यक्ष संवाद गरिरहनुभएको छ। “जनताको विश्वास जित्नु नै मेरो पहिलो लक्ष्य हो,” उहाँले एक कार्यक्रममा भन्नुभएको थियो। अभियानमा पार्टीका प्रदेश, जिल्ला र स्थानीय तहका नेताहरूको सक्रिय उपस्थिति छ। संयुक्त रूपमा परिचालित प्रचारप्रसारले संगठनात्मक बल र एकताको सन्देश दिएको समर्थकहरू बताउँछन्।
विश्लेषकहरूका अनुसार, चुनावको अन्तिम चरणमा देखिएको यस्तो सक्रियता र उत्साहले परिणाममा प्रभाव पार्न सक्छ। तर अन्तिम निर्णय भने मतदाताको मतले नै निर्धारण गर्नेछ।
चुनावको मुखमा बढेको यो माहोलले बाँके–२ को प्रतिस्पर्धालाई थप रोचक बनाएको छ। अब केही दिनमै मतपेटिकाले स्पष्ट पार्नेछ—यो उत्साह र लहर कत्तिको निर्णायक सावित हुन्छ।
